Gielddahoavdda geassedearvvahus

22.6.2022


Kunnanjohtajalta: Utsjoki valmis uuteen kehitysloikkaanMas fuomáša, ahte geassi lea joavdan Ohcejohkii? Máŋgasiidda mis sihkkaris geasi mearka leamašan árbevirolaččat fanasbihka hádja ja firpmiid gálgan jieŋaid vuolgima maŋŋá. Bihkkahádja ii leat váidalahtti gal dán gease dovdon njunnái ja fierpmitge leat ožžon báhcit áiteseaidnái heaŋgát.

Geassi ii leat liikká šluhttejuvvon, baicce dan mearkkat leamašan seamma sihkkarat go álo ovdalge. Giđđat Sámi luondu ealáska ja geassugoahtá jođánit. Lasta ihtigoahtá ovssiide ja eatnamat runiidit. Állapiid maŋŋá bohtet buot uhcit ja stuorát giđđalottit. Oahpes leaibeloddi lea fas ráhkadan beasi min šilljosoagi loddevuvdii. Šilljogietti hervejit šerresfiskes boallorásit ja beaivi báitá šearradin oppa ija.

Lea áigi návddašit geasis buot morrašiin fuolakeahttá. Duogábealde leat guokte lossa koronajagi, goas min nanusvuohta lea testejuvvon eanet go máhtiimet dálvit 2020 einnostit. Koronasge goit cevzziimet nu barggus go bearašeallimis. Eanaš mis lihkus smávit vahágiiguin go ovddalgihtii balaimet.

Hálidan liggosit giitit buot gieldda bargiid gillilis njuovžilvuođas ja buori oktasašbargovuoiŋŋas váttis áigodagas. Gieldda olbmuide gullá giittus gierdavašvuođas ja koronaráddjemiid ja -rávvagiid gulolaš čuovvumis, mii veahkehii min ceavzit pandemiijas.

Lea áigi ávvudišgoahtit geasi ja luomu. Lehkos min geassi lotkkodahtti ja buktos dat fas fámuid ruovttoluotta. Lea lohpi vajáldahttit bottožii bargoáššiid ja návddašit ánssášuvvon luomus ja vuoiŋŋastanbottus guhtege iežas miela mielde.

Oassi gieldda olbmuin bargá oppa geasi earret eará turismasuorggis, ja hálidan sávvat sidjiide fámuid ja ealaskas turismageasi!

Hálidan maid giitit gieldda bargiid ja olbmuid liekkus vuostáváldimis ja vuogas máhcahagas dán vuosttas giđa ođđa barggus.

Min oktasaš bargu joatkašuvvá fas borgemánus, go jorgalat geahčastagaid juo čuovvovaš jagi plánemii.

Buori geasi buohkaide!

Taina Pieski, gielddahoavda


Eará ođđasat