Ohcejoga gielda dieđiha koronapandemiija vejolaš ođđa eastadandoaimmain boahtte vahkus – dán dilis anus leat árat addon gildosat ja ávžžuhusat
26.2.2021
Suoma ráđđehus mearridii gaskavahku guovvamánu 24. beaivve koronapandemiija čavgadot eastadandoaimmain ja nu gohčoduvvon guvtteš dási atnuiváldimis. Sáhtát lohkat ášši birra ođđasa stáhtaráđi neahttasiiddus. Guvtteš dási ráddjehusat leat oaivvilduvvon maiddái Lappi buohccedikšunbiirii. Čavgadot ráddjehusaiguin lea ulbmil eastadit koronaepidemiija jođánis vearráneami ja hearkkibut njoammu virusvariánttaid lassáneami.
Ohcejoga gielda dieđiha koronavirusa vejolaš ođđa eastadandoaimmain (dego badjeskuvllaid sirdimis gáiddusoahpahussii, badjel guđa heakka čoahkkananráddjehusain ja bálvalansajiid giddemiin) boahtte vahkus dan maŋŋá, go earret eará Lappi guovlohálddahusdoaimmahat lea dahkan iežas doaibmaváldái gullevaš mearrádusaid.
Lappi guovllu koordinerenbargojoavkku otná, ođđa ávžžuhusaid sáhttá lohkat dáppe.
Ohcejoga gielddas lea fámus guovlohálddahusdoaimmahaga gielddus ja eará ávžžuhusat
Ohcejoga koronadilli lea ain ráfálaš. Gielddas leamaš koronanjoammun maŋimuš juovlamánus.
Ohcejoga gielddas lea fámus guovlohálddahusdoaimmahaga vuossárgga 22.2. addin mearrádus, man mielde buot almmolaš dilálašvuođat ja čoahkkimat, mat dollojuvvojit jogo olgun dahje siste, ja maidda oassálastet badjel 20 heakka, leat gildojuvvon 21.3. rádjai. Guovlohálddahusdoaimmahaga neahttasiiddus beassá geahččat, makkár almmolaš dilálašvuođaid ja čoahkkanemiid dát mearrádus guoská.
Čoahkkananráddjehusaid lassin gielda válddii vuossárgga 22.2. atnui Lappi guovllu koordinerenbargojoavkku ávžžuhusaid, mat leat ain fámus. Daid vuođul Ohcejoga gielda ávžžuha:
- sihke badjeskuvllaid ja logahaga oahppiid ja bargoveaga atnit ámadadjomáskkaid.
- gáiddusbarggu buot bargosajiide, main dat lea vejolaš.
- , ahte badjel 16-jahkásaččaid asttuáiggedoaimmat gaskkalduhttojit 14.3. rádjai.
- , ahte maiddái falástallanhárjehusain ja priváhta dilálašvuođain čuvvot badjel 20 heakka čoahkkananráddjehusa.
Ohcejoga gielda muittuha maiddái dáid vuođđorávvagiin:
- Ále mana buohccin almmolaš báikkiide. Jos dus leat makkárnu koronavirusii gullevaš dávdamearkkat, ohcal koronatestii.
- Fuolat ain guovtte (2) mehter dorvogaskkain ja giehta- ja gossanhygienas.
- Luđe iežat telefovdnii Koronavilkku-applikašuvnna. Jos dat addá almmuhusa vejolaš njoammunáitagis, čuovo dan rávvagiid.
- Ámadadjosuoji gánneha geavahit buot almmolaš báikkiin siste, go ii leat vejolaš doallat dorvogaskkaid, dego joavkojohtolagas, gávppiin, restoráŋŋain, almmolaš dáhpáhusain dahje dilálašvuođain jna. Lassin riskajovkui gullevaččat ja olbmot, geat deivet sin, galggašedje atnit suoji álo, go ii leat vejolaš doallat doarvái gaskka earáide.
Sáhtát lohkat Lappi buohccedikšunbiirre guovllu buot ráddjehusaid ja ávžžuhusaid dáppe.
Jos eahpidat alddát dahje lagašbirrasisttát koronavirusnjoammuma, váldde oktavuođa Ohcejoga dearvvasvuođaguovddážii (árgan diibmu 8–16 tel 040 181 0285, vahkuloahpaid, eahkediid ja árgabasiid tel 040 181 0281).
Koronavirusa dábálaš dávdamearkkat leat earret eará feber, gosahat, oaivebávččas, illáveadjin, luhčadávda, deahkkebákčasat, čottabávččas, nuorvu, vuoigŋanváttisvuođat ja hádja- ja smáhkkaáiccu hedjoneapmi. Mánáin dávdamearkkat sáhttet leat láivvit ja bistit oanehis áiggi. Koronavirusdávdda mearkkaid ii sáhte earuhit eará virusdávddaid mearkkain earágo koronavirusteasttain