Sihkkelastinjearahallanskovi vástádusat

30.12.2021

Oassin Ohcejoga gieldda ÄRM/FRN (äkillinen rakennemuutos/fáhkkes ráhkadusnuppástus) -áigumuša leat plánemin guovlogeaidnu 970 sihkkelastinturismii laktáseaddji projeavtta. Doarjun dihtii projeavtta plánema sáddejuvvui báikkálaš turismasuorggi fitnodagaide 10.12. jearahallanskovvi, mii gokčojuvvui gaskavahku 22. juovlamánu. Jearahallamii oaččuimet oktiibuot 13 vástádusa, ja vástádusaid vuođul sáhttá dadjat, ahte vástidan olbmot ledje dan mielas, ahte sihkkelastinturisma lea positiivvalaš vejolašvuohta nu sin iežaset fitnodaga go oppa Deatnogátti guovllu beales.

Vástidan fitnodatdoalliin gávdnojit jo doaibmit, geat leat investeren sihkkelastimii, sihke doaibmit, geat eai vuos oainne, man láhkai sii sáhtášedje sihkkelastinturismma vejolašvuođaid atnit ávkin. Jearahallamis albmanuvai fitnodatdoalliid gearggusvuohta sihke beroštupmi fállat sihkkelastinturisttaide viidát iešguđetlágan lasseaktivitehtaid ja sihkkelastiid dárbbašan bálvalusaid. Nana ovddidanáššin badjánii fitnodagaid oktasašbarggu lasiheapmi, masa fitnodatdoallit sávvet čavgadut sihke jierpmálut koordinastima. Dát guoská maiddái oktasaš oidnomii ee. sihkkelastingeinnodaga ja dasa laktáseaddji bálvalusaid hárrái. Vásttolašvuođa ja dorvvolašvuođa áššit badjánedje maiddái ovdan earenoamážit fitnodatjearahallamiin. Dánge oktavuođas badjánii ovdan rekryteremii ja bargofámu fitnašuvvamii laktáseaddji váttisvuođat.

Projeaktaplánemis váldojit vuhtii jearahallama ja fitnodatjearahallamiid vuođul ee. sihkkelastinturismii laktáseaddji máhttin, vásttolaš- ja dorvvolašvuođaáššit, sihke prográmmabálvalusaid ovddideapmi viidábut ja dasa laktáseaddji ovdamearkka dihtii ođđa bálvalusaid hutkan ja ovddideapmi. Fierpmáiduvvamii ja dieđu oažžuma dárbui sihke vuovdaleapmái biddjojuvvo earenoamáš fuomášupmi go projeavtta doaibmabijut plánejuvvojit. Rekryteremii laktáseaddji áššit váldojit nuppi plánema vuloš áigumuša doaibmabijuide.

Stuorra giittus buohkaide jearahallamii vástidan olbmuide! Mii ordnet velá ođđajagemánu loahpabealde áigumušplánemii laktáseaddji dilálašvuođa, mas čájehuvvo hámus ja váldojit dasa kommeanttat vuostá.

Mađe várte?

ÄRM/FRN (fáhkkes ráhkadusnuppástus) -álggahanáigumuša, mii lea Ohcejoga gielddas  jođus, oktan joatkkaáigumuššan lea plánema vuolde guovlogeaidnu 970 sihkkelastinprojeakta man ulbmilat leat oaivvilduvvon nannosit turismadoaibmasuorggi ja dan lavttadoaibmasurggiid johtilis ealáskahttimii ja ođasmahttimii, dasgo projeakta viggá doarjut báikkálaš turismasuorggi fitnodagaid, mat leat šaddan doajáhatáiggi sisa Deanu guollebivdingildosa sihke korona mielde. Dollojuvvon rabas plánendilálašvuođa (25.11.) vuođul mearaimet sáddet jearahallama báikkálaš fitnodagaide, vai sáhtašeimmet kártet fitnodagaid beroštumi áigumuša hárrái.

Jos háliidat lassedieđu ÄRM/FRN-ovddidanáigumušas, de fina oahpásmeamen áigumuššii dáppe.

Lassedieđut;
Eeva-Maarit Aikio
Ovddidan- ja ealáhushoavda
+358400 151 294
eeva-maarit.aikio@utsjoki.fi

Siiri Uino
Projeaktakoordináhtor
+358405442058
siiri.uino@utsjoki.fi


Eará ođđasat