Stuđeantagahpira oaivái bidjan 5.6.2021 Ohcejogas – Rávvagat logahaga oahppiide, oahpaheaddjiide sihke ođđa stuđeanttaid lagašolbmuide
19.5.2021
Lappi guovlluhálddahusvirgedoaimmahaga mearrádusa mielde Lappi buohccedikšunbiirre gielddain sáhttá ordnet áigodagas 4.5.–31.5.2021 eanemustá 50 olbmo álbmotdilálašvuođaid ja almmolaš čoahkkimiid. Ohcejoga gieldda čuvgehusdoaibma lea dán vuođul mearridan, ahte Ohcejoga sámelogahaga stuđeantaávvodoaluide 5.6.2021 sáhttet boahtit báikki ala logahaga oahppit ja bargit sihke guhtege ođđa stuđeanttas vihtta (5) fuolkki dahje oahppása.
Báikki ala dilálašvuhtii ii oaččo boahtit, jos leat láivvesge dávdamearkkat. Dilálašvuođas galgá geavahit máskkaid ja duođaštusaid juogedettiin ii oaččo gieđa addalit. Báikki ala ii oaččo maiddái boahtit, jos olmmoš lea ovdal dilálašvuođa 14 jándora áiggis mátkkoštan koronavirusepidemiija leavvan- dahje vearránanmuttu guovlluin Suomas dahje olgoriikkain dahje sus leamašan lagaškontákta dákkár olbmui.
Jos ođđa stuđeanttat leat ovdalaš ávvodoaluid guovtti vahku áiggis fitnan ovdamearkka dihte sisabeassaniskosiin koronavirusdávdda vearránan- dahje leavvanguovlluin, de sávaldahkan lea ahte sii fitnet koronavirusteasttas eanemustá 72 diimmu ovdal stuđeantaávvodoaluid. Koronavirustestii beassá, go váldá oktavuođa Ohcejoga dearvvasvuođaguovddážii 040 181 0285.
Dávdaluvvanriskkaid geažil dilálašvuođas ii leat buorre lávlut ovttas. Sáhkavuoruid ja musihkkaovdanbuktojumiid lea buorre ordnet nu, ahte loaiddasteaddjiid ja geahččiid gaska lea doarvái guhkki (uhcimustá golbma mehtera) vai dávdaluvvanriska báhcá nu uhccin go vejolaš.
Danin go AVI mearrádus 50 heakka čoahkkananráddjehusas lea fámus 31.5.2021 rádjai, de dát koronarávvagat dárkkistuvvojit vel ovdal ávvodoaluid. Jos epidemiijadilli nu gáibida, de plána sáhttá rievdadit dahje dilálašvuođa šluhttet. Jos rávvagiidda bohtet nuppástusat, de daid birra dieđihuvvo sierra.
Giđđadearvvuođaiguin,
Virpi Veskoniemi
Čuvgehushoavda-rektor