Buresboahtin sámegielat yogai, filbmaeahkedii, mánáid- ja nuoraideahkedii ja giellaságastallamii! Giellavahkus dáhpáhuvvá Ohcejogas!
Deanuleagis sámástit -projeakta ordne máŋggalágan doaimmaid sámi giellavahkus 19.–25.10. Buot doaimmat leat nuvttá ja rabas buohkaide.
FUOM. UNNA MÁNÁID TEÁHTEREAHKEDAT JA YOGA-DIIMMUT OHCEJOGA GILIIN LEAT ŠLUHTTEJUVVON ČAVGEJUVVON KORONARÁDDJEHUSAID DIHTE. ŠÁLLOŠAT ÁŠŠI! DAID SADJÁI LÁGIDUVVOJIT VIRTUÁLA YOGA-DIIBMU JA GUOKTE FILBMAEAHKEDA OHCEJOGAS.
Deanuleagis sámástit -projeakta ordne sámi giellavahkus 19.–25.10. sámegielat doaimmaid Ohcejogas!
Vahku áigge ordnejuvvojit:
- Filbmaeahkedat
- Mánáid ja nuoraid suohtastallaneahkedat
- Virtuála yin yoga -boddu
- Deanuleagi virtuála Ártegis ságat -giellaságastallan
Buot dáhpáhusat leat sámegillii, ollásit nuvttá ja rabas buohkaide!
Vahku prográmma lea vuolábealde. Dáhpáhusdieđut gávdnojit maiddái Deanuleagis sámástit -projeavtta Facebook– ja Instagram-konttuin.
Loga vuolábealde maiddái dáhpáhusaid koronadorvvolašvuođarávvagiid.
Prográmma
Ga 21.10. dbm 17 Chihiro ilmmiid gaskkas -filbmaeahket Ohcejogas
Buresboahtin návddašit sámegielat Chihiro ilmmiid gaskkas -ealligovas ja herskuin Ohcejoga Davvenásti-filbmateáhterii!
Prográmma:
17.00–17.30 Herskostallan ja káfestallan
17.30–19.35 Chihiro ilmmiid gaskkas
Fuom! Koronaráddjehusaid dihte filbmateáhterii čáhket dušše s. 20 geahčči. Almmut iežat ovddalgihtii gaskavahku 21.10. dbm 15.00 rádjai: aletta.lakkala@utsjoki.fi / +358 40 186 7152. Báikkit addojuvvojit almmuhanortnega mielde.
Be 23.10. dbm 17 Jikŋon 2 -filbmaeahket Ohcejogas
Buresboahtin návddašit sámegielat Jikŋon 2 -ealligovas ja herskuin Ohcejoga Davvenásti-filbmateáhterii!
Prográmma:
17.00–17.30 Herskostallan ja káfestallan
17.30–19.15 Jikŋon 2
Fuom! Koronaráddjehusaid dihte filbmateáhterii čáhket dušše s. 20 geahčči. Almmut iežat ovddalgihtii gaskavahku 22.10. dbm 15.00 rádjai: aletta.lakkala@utsjoki.fi / +358 40 186 7152. Báikkit addojuvvojit almmuhanortnega mielde.
Be 23.10. dbm 17 & 21 Mánáid ja nuoraid suohtastallaneahket Gáregasnjárggas
Buresboahtin mánáid ja nuoraid sámegielat suohtastallan-, speallan- ja herskostallaneahkedii Gáregasnjárgga Sáivu-gilidállui!
Deanuleagis sámástit -projeavtta bargi Niki Rasmus speallá ovttas mánáiguin ja nuoraiguin. Dáhpáhusas ii goittotge leat eisige bággu speallat, boađe áinnas muđui fal suohtastallat ja herskostallat! Dáhpáhusas leat fállun mánáide ja nuoraide pizzat ja bruvssat!
Prográmma:
17.00–20.00 Sámegielat Minecraft, lávdespealut, pizzat & bruvssat 8–12-jahkásaččaide
21.00–00.00 Sámegielat Fortnite, lávdespealut, pizzat & bruvssat 13–16-jahkásaččaide
Lá 24.10. dbm 14.00–15.30 Sámegielat yoga neahtas
Buresboahtin buohkaide rabas sámegielat neahtta-yogai!
Yoga-oahpaheaddji Gunvor Guttorm doallá yin yoga -bottu, mii heive buohkaide.
Gunvor Guttorm lea oahppan ashtanga yoga -oahpaheaddji ja lea váldán lassioahpu yin yogas gitta čiekŋudeaddji oahpuid rádjai. Guttorm lea yogastallan jeavddalaččat, masá beaivválaččat, 15 jagi. Son lea doallan yogaklássaid earret eará Guovdageainnus ja Johkamohkis.
Yin yoga lea ráfálaš ja terapeuhtálaš yogastallan, mii ráfoha sihke goruda ja miela. Dat heive erenoamážit olbmuide, geain leat deahkit bákčasat ja stirdon, molsašuddi miella, váibasat dahje ráfehis dovdu.
Dárbbašat yogastallamii vuloža ja guottá. Cokka biktasiid, maiguin sáhtát lihkadit.
Yoga-boddu lea nuvttá ja rabas buohkaide. Beasat dasa mielde Zoom bokte, liŋka gávdno dákko. Jos it leat luđen alccet Zoom-prográmma, ii heahti! Beasat yogai njuolga, go deattát Zoom-siiddus “Join from Your Browser”.
Buresboahtin vuoiŋŋastit ja ráfot!
Lá 24.10. dbm 17 & 21 Mánáid ja nuoraid suohtastallaneahket Ohcejogas
Buresboahtin mánáid ja nuoraid sámegielat suohtastallan-, speallan- ja herskostallaneahkedii Ohcejohkii, Sámi musihkkaakademiija dállui!
Deanuleagis sámástit -projeavtta bargi Niki Rasmus speallá ovttas mánáiguin ja nuoraiguin. Dáhpáhusas ii goittotge leat eisige bággu speallat, boađe áinnas muđui fal suohtastallat ja herskostallat! Dáhpáhusas leat fállun pizzat ja bruvssat!
Prográmma:
17.00–20.00 Sámegielat Minecraft, lávdespealut, pizzat & bruvssat 8–12-jahkásaččaide
21.00–00.00 Sámegielat Fortnite, lávdespealut, pizzat & bruvssat 13–16-jahkásaččaide
So 25.10. dbm 14.00–16.00 Deanuleagi virtuála Ártegis ságat
Buresboahtin ságastallat ja gažadit giellačehpiid Deanuleagi sámegielas!
Jearaldat lea virtuála giellaságastallamis, mii sáddejuvvo neahta bokte. Ságastallama láidesta sámegiela professor Luobbal Sámmol Sámmol Ánte, Ante Aikio. Oassálastit sáhttet jogo dušše beare čuovvut dáhpáhusa, searvat ságastallamii dahje gažadit Aikio ja eará giellačehpiid Deanuleagi gielas.
Dát virtuála giellaságastallan sáddejuvvo sihke Deanuleagis sámástit -projeavtta Youtube-kanála ja Microsoft Teams bokte.
Youtube-kanálas sáhtát oassálastit ságastallamii ja ovdanbuktit gažaldagaid čálalaččat, Teamsis fas sáhtát váldit oasi maiddái kamerain ja mikrofovnnain.
Ságastallan báddejuvvo ja dan lea vejolaš geahččat maiddái maŋŋá Youtubes.
Koronadorvvolašvuohta
Mii čuovvut buot dáhpáhusain koronadorvvolašvuođa rávvagiid. Dan dihte:
! Ále boađe dáhpáhusaide, jos dus leat makkárge dávdamearkkat.
! Muitte doallat dorvvolaš gaskka earáide.
! Fuolat buorre giehtahygienas, dáhpáhusain leat gieđaid desinfiserenávdnasat.
! Mii ávžžuhat geavahit máskka. Jos dus ii leat iežat máska, fállat dakkára dutnje.
Mii lea Deanuleagis sámástit?
Deanuleagis sámástit lea guovttejahkásaš Interreg Nord -projeakta (2020–2022), man ollašuhttet Ohcejoga gielda, Sámi ealáhus- ja guorahallanguovddáš (SEG) ja Kajaani ámmátallaskuvla (KAMK).
Projeakta gáhtte Deanuleagi sámegiela ja árbedieđu. Projeakta fállá sámástanlávddiid Deanuleagi olbmuide ja buktá olbmuid guovtte beal rájá eambbo oktii.
Doaimmain, ulbmiliin ja projeaktaveagas sáhtát lohkat eanet projeaktasiiddus.