Gielddahoavda Taina Pieski sáhkavuorru sámeváinniid gokčandilálašvuođas Bassi Ulrihka girku hávdeeatnamis 8.8.2022

Buorit mieđušteaddjit,

Lea illu ja stuorra gudni ovdanbuktit Ohcejoga gieldda dearvvahusa dán oktasaš dilálašvuođas, go sámeservošeamet lahtuid bázahusat máhcahuvvojit ruoktot.

Midjiide buohkaide lea dehálaš, ahte dáppe Bassi Ulrika girku hávdeeatnamis goivojuvvon sámeváinnit máhcahuvvojit sivdniduvvon eatnamii iežaset jovkui. Mii váldit lieggasit vuostá buot 68 váinni. Buktos ruoktotmáhccan sidjiide ráfi.

Sámeváinniid leat goivon hávddiin gitta nuppi máilmmisoađi rádjai. Váinniid leat goivon hávdeeatnamiin servoša lobi haga suopmelaš ja olgoriikkalaš dutkiid doaimmas nálledutkamuša dárbbuide. Dákkár dutkamuša dárkkuhussan lei dutkat gos sierra álbmogat leat vuolgán ja sin ovdáneami sihke árvvoštallat sierra álbmogiid nu, ahte nuppiid doallat primitiivvabun go nuppiid. Dáktečoakkáldagaid leat seailluhan jahkelogiid Helssega universitehta anatomiija lágádusas.

Min sápmelaš máttut besset viimmat eatnamii. Sin leahkin nanne ja rávve min dáláš ja boahttevaš sohkabuolvvaid. Leat ožžon ruovttoluotta ráđđeaddiid ja dás álgá buorráneapmi historjjá vearredaguin.

Eana lea midjiide divrras, go das ovddit sohkabuolvvat leat johtán ja oahpahan mo galgá eallit ja leat. Viimmatge min viissis máttut, geat guddet dološáiggi viissisvuohtamet leat máhccan ruoktot ja ožžon ráfi. 

Háliidan giitit lieggasit Ohcejoga gieldda bealis buohkaid geat leat dahkan dán ruoktotmáhccama vejolažžan: erenomážit Sámemusea Siidda Eija Ojanlatva, Sámedikki Vuokko Hirvosa, Suoma evangelalaš luteralaš girku earkebisma Tapio Luoma, bisma Jukka Keskitalo, girkohearrá Tuomo Huusko ja cálli Erva Niittyvuopio, Sámi Siidda ja Ohcejoga searvegotti sihke Oahpahus- ja kulturministeriija, .

Illudit ovttas dán fiinna ruoktotmáhccama beaivvis!