Ođđajagimánu 2022 dilli Ohcejoga ÄRM-projeavttas – kulturárbeprojeavtta bargit válljejuvvon
2.2.2022
Jahki 2022 lea vuolgán Ohcejoga ÄRM-projeavttas (Fáhkkes ráhkadusnuppástus) fárttain johtui ja leage áigi guovllastit, mo mii leat das hábmejuvvon joatkkaprojeavttaiguin ovdánan. Jos it dieđe, mas ÄRM-projeavttas lea gažaldat, sáhtát lohkat lasi dáppe.
Ohcejoga ráhkadusnuppástusollisvuohta gávdnagoahtá iežas hámi ja joatkkaprojeavttaid doaibma beassá álgui. ÄRM-ollisvuođas guovddážis lea oasálašvuođa ovddideaddji boahttevuođabargu, mainna ohccojuvvojit ođđa ovdánanvejolašvuođat Ohcejoga gieldda eallinvuoibmái sihke dálá ja ođđa vugiiguin.
Gielda lea ožžon AKKE-ruhtadeami sihke ráhkadusnuppástusa koordineremii ja boahttevuođabargui. Guovva-njukčamánus dát bargu álggahuvvo čohkkemiin guovlluguovdasaš boahttevuođabargojoavkku, boahttevuođaforuma. Dan bálddas álggahuvvo maid eallinfápmobarggu ja -bálvalusaid ođasmahttin. Jos oažžut ruhtadeami uYritys-projektii, de vuođđuduvvo das báikkálaš fitnodagaide jođihanforum, mas áššedovdiid álgosuokkardeami bokte vulgojuvvo ovttas guorahallat ja ovddidit ealáhusaid doaibmabirrasa ja boahttevuođagova.
Vulobealde leat logahallon ÄRM-projeavtta sierra temát ja daidda gullevaš ođđa projeavttaid áigeguovdilis dieđut ja ođđasat.
Fitnodatdoaibman, barggolašvuohta ja máhttin -temá
- uDigi – Ohcejoga digitála eallinfápmu
- Projektii lea juolluduvvon Lappi lihtu REACT-EU-ruhtadeapmi. Projeakta álgá 1.3.2022 ja dat ollašuhtto ovttas ProAgria Lappiin. Projeavtta váldoulbmilin lea ovddidit ja digitaliseret eallinfápmobálvalusaid.
- uYritys
- Projektii lea ohccojuvvon ruhtadeapmi ESR:s 20.1.2022 ja vuordit ruhtadanmearrádusa. Projeavtta váldoulbmilin lea ovddidit fitnodagaid máhtu, bargoburesveadjima sihke fierpmáiduvvama. Projeakta lea plánejuvvon earet eará jearahallama, bargobáji sihke ovttaskas fitnodatdoalliid jearahallamiid bokte.
Sápmelašvuohta, vásttolašvuohta ja buresveadjin -temá
- Sámi kulturárbbi nannen Deanuleagis
- Projeavtta ruhtada Leader Pohjoisin Lappi. Projektii leat válljejuvvon bargit; Piia Nuorgam álggaha projeavttas projeaktahoavdan 80 proseantta bargoáiggiin guovvamánus ja projeaktakoordináhtorin doaibmá Anni Ahlakorpi 20 proseantta bargoáiggiin. Projeakta álggahuvvo 1.2.2022. Fina oahpásmuvvamin projektii buorebut dáppe.
- Gieldda olbmuid ja fitnodatdoalliid buresveadjinprojeakta
- Projeavtta plánen joatkašuvvá ja mii ohcat dasa ruhtadeami nu jođánit go vejolaš.
Infra ja olahahttivuohta -temá
- Deanu sihkkelastingeinnodaga infra ja ovddideapmi, ovddidanprojeakta ja infra plánenprojeakta
- Sihkkelastinturisma / Teno Outdoor -ovddidanprojektii ohccojuvvo AKKE-ruhta Lappi lihtus álgosaččat guovvamánu áigge. Projeavtta sisdoallu lea hápmašuvvagoahtán. Giitu buot fitnodatdoaibmiide, geat leat dorjon plánema iešguđetlágan ráđđádallamiiguin ja jearahallamiiguin!
- Projeavtta mihttomearrin lea oažžut áigái ođđa rahpamiid, mainna sáhttá ealáskahttit báikkálaš fitnodatdoaimma sihke vástidit Deanu turismma ja kultuvrra rievdan dillái. Projeavtta nogadettiin lea hábmejuvvon Teno Outdoor -ollisvuohta, mii oidno maid riikkaidgaskasaš medias ja mii lea buktán guvlui uhcimustá guokte mátkeordnejeaddjijoavkku. Ollisvuohta vuođđuduvvá čuozáhatjoavkkuid, áššehasdárbbuid ja márkaniid analysaide. Fitnodagat, mat leat mielde, leat diđolaččat ođđalágan márkaniin ja daid dárbbuin, ja sin leat lágidan fitnodatrávvema biirii buktagiid ja bálvalusaid ovddideami várás.
- Sihkkelastinturismma ovddidanprojeavtta báldii lea ohccojuvvon ruhtadeapmi sihkkelastinturismma ja dasa laktáseaddji lassebálvalusaid infradárbbuid čielggadeapmái. Čuozáhahkan leat guovlogeaidnu 970, dasa laktáseaddji čuggestagat sihke beassan gažaldatvuloš geinnodagaide.
- Ohcejoga ja Gáregasnjárgga eallinfápmodálut/-sajit
- Gáregasnjárgga eallinfápmodálu plánen lea ovdánan. Dál projeavtta birra čállojuvvo čielggadus, masa čoggojuvvojit sajiid geavaheaddjijoavkkut sihke sin dárbbut sajiid ektui.
Amma válddát midjiide oktavuođa, jos miinu áššiid bohciidahttá jurdagiid ÄRM-ollisvuođa joatkkaprojeavttain dahje daid plánemis. Vástidat mielas din gažaldagaide! Amma muittát maid geahčadit Ohcejoga gieldda fierbmesiidduid sihke ealáhusdoaimma Facebook-siidduid, dasgo almmuhat daid bokte sierralágan dilálašvuođain ja dáhpáhusain. Sávvat projeavttaid plánemii ja ollašuhttimii nu viiddis oktasašbarggu báikkálaččaiguin go vejolaš– nu ahte čuovuthan min beaivádemiid!
Mii ÄRM-projeakta?
Ohcejoga gielddas álggahuvvui ÄRM-bargu giđđat 2021, go gielda gárttai fáhkkes ráhkadusnuppástusa dillái koronapandemiija ja Deanu luossabivdogildosa dagahan vuorddekeahtes hástalusaid geažil. Dása laktásettiin gielda lea ožžon Lappi lihtus AKKE-ruhtadeami ÄRM-álggahanprojektii, mii dahká vejolažžan Ohcejoga fáhkkes ráhkadusnuppástusa doaibmabijuid jođánis álggaheami, man ulbmilin lea ovddidit guovllu ealáhuseallima ealáskeami ja ođasmuvvama. ÄRM-álggahanprojeakta doallá sisttis golbma temáollisvuođa (Fitnodatdoaibman, barggolašvuohta ja máhttin / Sápmelašvuohta, vásttolašvuohta ja buresveadjin / Infra ja olahahttivuohta), mat fas dollet sisttisteaset máŋggaid sierralágan projeavttaid. Fina oahpásmuvvamin projektii buorebut dáppe. Váldde maid roahkkadit midjiide oktavuođa, jos hálidat gullat lasi!
Lassediehtu;
Eeva-Maarit Aikio
Ovddidan- ja ealáhushoavda
+358 400 151 294
eeva-maarit.aikio@utsjoki.fi
Vuokko Tieva-Niittyvuopio
Gielddahoavda, Ohcejoga gielda
+358 400 933 754
vuokko.tieva-niittyvuopio@utsjoki.fi
Siiri Uino
Projeaktakoordináhtor
+358 40 544 2058
siiri.uino@utsjoki.fi