Ohcejoga koronavirusinfekšuvnna vejolaš njoammumat leat čielggaduvvon, ođđa njoammumat eai leat gávdnon – gielddas ávžžuhusat dilálašvuođaid ordnejeaddjiide ja valáštallandoaimmaid oassálastiide

Ohcejoga gielddas eai leat bearjadatiđida 27.11. rádjai gávdnon ođđa koronavirusnjoammumat. Gielddas addojuvvui duorastaga 26.11. okta positiiva koronavirusčájánas, ja dearvvasvuođafuolahus lea dan rájes kárten olbmuid, geaidda infekšuvdna lea sáhttán njoammut.

Ohcejoga gielda dieđihii duorastaga, ahte Hotelli Utsjoki restauráŋŋas vuossárgga dahje maŋŋebárgga gaskabeaiáigge fitnan olbmuide lea sáhttán njoammut koronavirusinfekšuvdna. Lea čielgan, ahte dán dáhpáhusbáikái laktása okta njoammunáitta. Dearvvasvuođafuolahus lea fáhten olbmo ja mearridan sutnje karantena. Maiddái eará, dán njoammumii laktáseaddji njoammunáitagat Ohcejogas leat dál čielggaduvvon ja olbmot mearriduvvon karantenii.

Koronavirusii buohccán olmmoš veadjá bures ja lea erremis. Njoammun laktása Anára njoammumii ja lea ožžon álggus jáhkkimis Levi máilmmecup-vahkuloahpa dáhpáhusain.

Ohcejoga gieldda dearvvasvuođabálvalusat doibmet dábálaččat.

Gieldda nana máskaávžžuhus ja eará rávvagat leat ain fámus

Ohcejoga vástideaddji doavttir Heidi Eriksen muittuha buot gieldalaččaid mannat jođánamos lági mielde koronavirustestii, jos dovdet makkárnu koronavirusinfekšuvnna dávdamearkkaid. Dávdamearkkat ja rávvagat testii beassamis leat dieđáhusa loahpas.

Eriksen muittuha Ohcejoga gieldda nana máskaávžžuhusas earret eará buot dakkár diliin, main ii leat vejolaš doallat dorvvolaš gaskka earáide. Maiddái Ohcejoga gieldda buot árat ávžžuhusat ja rávvagat gieldalaččaide, fitnodagaide ja mátkkošteaddjiide leat ain fámus, daid gávnnat dáppe.

Iehčanasvuođabeaivve eai leat doalut, fuomášahttin maiddái eará dilálašvuođaide

Ohcejoga gielda ii koronadili dihte ordne dán jagi iehčanasvuođabeaivve doaluid, dušše rássegierddu luoitima.

Gielda ávžžuha maiddái servviid čuovvut dilálašvuođaineaset erenoamáš fuolalaččat rávvagiid, mat leat addojuvvon koronavirusa leavvama eastadeapmin.

Gielda ávžžuha lihkadandoaimma oassálastiid mearkut iežaset dieđuid

Ohcejoga gielda bivdá lihkadansáliid geavaheaddji valáštallanservviid ja álšasáliid geavaheaddjiid giddet dál erenoamáš bures fuopmášumi sihke gieldda almmolaš koronadorvvolašvuođarávvagiidda ja valáštallanservviide ja lihkadansáliid eará geavaheaddjiide árat addojuvvon rávvagiidda.

Dáid lassin gielda ávžžuha, ahte lihkadansáliid geavaheaddjit merkot vuoruid oassálastiid namaid bajás ja álšasáliid geavaheaddjit merkot sáliid gihppagiidda namaset, beaivemeari ja diibmoáiggiid, goas leamašan álšasáles. Listtut álkidahttet vejolaš koronavirusinfekšuvnnaid njoammunbálgáid čielggadeami.

Heidi Eriksen
Vástideaddji doavttir
Tel. 040 181 0284

Vuokko Tieva-Niittyvuopio
Gielddahoavda
Tel. 0400 933 754

Jos eahpidat alddát dahje lagašbirrasisttát koronavirusnjoammuma, váldde oktavuođa Ohcejoga dearvvasvuođaguovddážii (árgan diibmu 8–16 tel 040 181 0285, vahkuloahpaid, eahkediid ja árgabasiid tel 040 181 0281).

Koronavirusa dábálaš dávdamearkkat leat earret eará feber, gosahat, oaivebávččas, illáveadjin, luhčadávda, deahkkebákčasat, čottabávččas, nuorvu, vuoigŋanváttisvuođat ja hádja- ja smáhkkaáiccu hedjoneapmi. Mánáin dávdamearkkat sáhttet leat láivvit ja bistit oanehis áiggi. Koronavirusdávdda mearkkaid ii sáhte earuhit eará virusdávddaid mearkkain earágo koronavirusteasttain.

Lasi dieđuid koronavirusdilis gávnnat earret eará Ohcejoga gieldda, Lappi buohccedikšunbire ja THL neahttasiiddus.