Ohcejoga gieldda koronadieđáhus 12.10.2020: Nana muohtomáskaávžžuhus gieldda buot almmolaš sajiin

Ohcejoga gielda ávžžuha sihke gieldalaččaid, fitnodagaid ja buot gieldda galledeaddjiid geavahit máskka almmolaš sissajiin.

 

Vearránan koronavirusdili dihte Ohcejoga gielda muittuha garrasit sihke iežas gieldalaččaid, fitnodagaid ja turisttaid čuovvut muohtomáskaávžžuhusa gieldda buot almmolaš sissajiin, main ii leat vejolaš doallat dorvvolaš gaskka eará olbmuide.

Lappi buohccedikšunbire ávžžuhii 8.10. olbmuid geavahit suodjemáskkaid dán dilis almmolaš johtolagas, gávppiin, gávpeguovddážiin ja buot čoahkkanemiin, dilálašvuođain ja dáhpáhusain, mat dollojuvvojit almmolaš sissajiin. Maiddái mátkkoštan- ja restauráŋŋasurggiin ávžžuhit sihke áššehasaid ja bargiid geavahit máskkaid. Áššehasbálvaleaddjit ja bargit, geat leat monu kontávttas áššehasaiguin, galget geavahit muohtomáskka, jos sis ii leat suodjepleksa anus. Dáid lassin fámus lea ain maiddái geassemánus 2020 addojuvvon almmolaš muohtomáskaávžžuhus.

Ohcejoga gielda ávžžuha garrasit sihke iežas gieldalaččaid, fitnodagaid ja buot gieldda galledeaddjiid geavahit máskka buot ovddabealde máinnašuvvon diliin. Dát oaivvilda máskka geavaheami maiddái ovdamearkka dihte gielddadálus ja kulturdoaimma bálvalusain, dego girjerájus ja filbmateáhteris, finadettiin. Gielda juohká nuvttá suodjemáskkaid olbmuide, geain lea heajos ruhtadilli. Dáid máskkaid viežžanáiggiid ja -báikkiid gávdná dáppe. Gieldda bargit geavahit máskka buot áššehasbálvaleamis.

Ohcejoga gielda muittuha muohtomáskaávžžuhusa lassin olbmuid buorre giehta- ja gossanhygienas. Almmolaš dilálašvuođaide, čoahkkanemiidda ja sajiide, main leat eará olbmot oktanaga, ii oaččo boahtit, jos leat makkárge dávdamearkkat. Koronavirusa mearkkat sáhttet leat earret eará gosahat, čottabávččas, feber, vuoigŋanváttisvuođat, deahkkebákčasat, čoavjeváttut ja oaivebávččas. Olbmuid, geat gullet riskajovkui, ávžžuhit epidemiijaáigge garvit lagaskontávttaid.

Ohcejoga gielda muittuha ná čakčaluomuid áigge maiddái, ahte jos olmmoš boahtá Ohcejoga gildii olgoriikkain (Ohcejoga rádjagielddaid olggobealde), gávdnojit THL siiddus rávvagat eaktodáhtolaš karantenii. Koronai laktáseaddji karantena- ja errenáiggiid rávvagat nuppástuvve vuossárgga 12.10. Ovdamearkka dihte eaktodáhtolaš karantena oanui 14 beaivvis 10 beaivái.

Lassin Ohcejoga gielda ávžžuha buohkaid, geat johtet gielddas, luđet Koronavilkku-applikašuvnna.

Áiggedását diehtu koronavirusdili váikkuhusain Ohcejoga gieldda bálvalusaide gávdno dáppe. Lasi davimus Suoma dorvvolašvuođarávvagiin sáhttá lohkat koronaturvallinenlappi.fi-siiddus.

Jos eahpidat alddát dahje lagasbirrasis koronavirusnjoammuma, váldde jođánamos lági mielde oktavuođa Ohcejoga dearvvasvuođaguovddážii (árgan diibmu 8–16 tel 040 1810285, vahkuloahpaid, eahkediid ja árgabasiid tel 040 1810281) de beasat koronatestii.

Lassidieđut:

Heidi Eriksen
Vástideaddji doavttir
Tel. 040 1810284

Vuokko Tieva-Niittyvuopio
Gielddahoavda
Tel. 0400 933 754


Muita uutisia