Ohcejogas ii leat šat duođaštuvvon koronavirusa njoammunáitta: Dearvvasvuođadoaimma gallestallangielddus nohká, gielddadállu bissu ain gitta
5.10.2020
Ohcejoga gielddas eai leat maŋimuš guovtte vahku áigge boahtán ovdan dáhpáhusat, main olmmoš livčče gártan koronavirusa njoammunáitaga vuollái. Dan dihte gielda burgigoahtá oasi ráddjehusain.
Ohcejoga dearvvasvuođaguovddáža seaŋgaossodaga, Dorvu, Seitakartano ja ASPA-ruoktu Goađi gallestallangielddus nohká vuossárgga 5.10. Pasieanttaid lea dál vejolaš galledit čuovvovaš eavttuiguin:
- Galledeaddjis dahje suinna seamma dálus ássiin eai oaččo leat infekšuvnna dávdamearkkat.
- Galledeaddji galgá fuolahit buorre giehtahygienas ja geavahit kirurgalaš njálbme-njunnemáskka olles galledeami áigge.
- Galledeaddji galgá čuovvut bargoveaga rávvagiid dorvogaskkain. Galledemiid áigge ii oaččo buorastahttit iige sallut.
- Pasieanttaid sáhttet galledit 1–2 olbmo hávil.
Dearvvasvuođaguovddáža vuostáiváldin ja laboratoria, ruovttubuohccedikšun, rávvehat, skuvladearvvasvuođafuolahus, fysioterapiija, bátnedikšu ja psykiátralaš buohccedivššára vuostáiváldin doibmet dábálaččat.
Gielddadoaimmahat bissu gitta doaisttážii. Mii sávvat, ahte gieldalaččat dikšot áššiideaset jogo šleađgapoasttain dahje telefovnnain. Jos dárbu, sáhttit ordnet maiddái persovnnalaš deaivvadeami. Gielddadoaimmahaga almmolaš nummir lea 040 188 6111, šleađgapoasta kunnanvirasto@utsjoki.fi. Bargoveaga oktavuođadieđut gávdnojit dáppe. Skoviid sáhttá guođđit lohkkaduvvon poastakássii, mii lea gielddadoaimmahaga maŋŋeuvssa (parkerensajiid bealde) guoras.
Gieldda asttuáiggedoaimmat ordnejuvvojit dábálaččat. Asttuáiggedoaimmaide oažžu oassálastit dušše dearvvasin, ja buot doaimmain galgá fuolahit giehta- ja gossanhygienas ja čuovvut eará dorvvolašvuođarávvagiid.
Árrabajásgeassin ja skuvllat dieđihit bearrašiid, jos koronadilli váikkuha doaimmaide.
Gielda juohká ain nuvttá muohtomáskkaid olbmuide, geain lea fuones ruhtadilli. Máskkaid viežžanbáikkiin ja -áiggiin gávdná dieđuid dáppe.
Jos eahpidat alddát dahje lagasbirrasis koronavirusnjoammuma, váldde oktavuođa Ohcejoga dearvvasvuođaguovddážii (árgan diibmu 8-16 tel. 040 1810285, vahkuloahpaid, eahkediid ja árgabasiid tel. 040 1810281) de beasat koronatestii.
Lasi dieđuid koronavirusdilis gávnnat earret eará Ohcejoga gieldda, Lappi buohccedikšunbire ja THL neahttasiidduin.
Heidi Eriksen
Vástideaddji doavttir
Tel. 040 1810284
Vuokko Tieva-Niittyvuopio
Gielddahoavda
Tel. 0400 933 754