Riikkabeaiválggat jagis 2023 Ohcejoga gielddas
Govva: Vuoigatvuohtaministeriija
Riikkabeaiválggat doaimmahuvvojit sotnabeaivve 2.4.2023.
Digitála- ja álbmotdiehtodoaimmahat ráhkada almmuhankoartta juohkehaččas, gii lea váldon jietnavuoigatvuođaregistarii, ja sádde dan maŋimustá 9.3.2023 buot daidda jietnavuoigadahtton olbmuide, geaid čujuhus lea dieđus. Jietnavuoigatvuođaregistara dieđut leat oaidninláhkai ja nuvttá oažžumis magistráhtain Digitála- ja álbmotdiehtodoaimmahaga meroštallan báikkiin 20.2.2023 rájes. Olmmoš, guhte lea iežas mielas guđđon vuoiggaheamet eret jietnavuoigatvuođaregistaris dahje sutnje guoskevaš merken lea boastut, sáhttá dahkat njulgengáibádusa Digitála- ja álbmotdiehtodoaimmahahkii maŋimuštá 17.3.2023 dmu 16. Jietnavuoigatvuođaregisttar oažžu lága fámu 21.3.2023 dmu 12 rájes.
Jietnavuoigadahtton sáhttá jienastit ovddalgihtii man beare almmolaš ovdajienastanbáikkis ruovttueatnamis dahje olgoriikkain. Ovdajienasteapmi ruovttueatnamis ordnejuvvo áigodagas 22.3.–28.3.2023 ja olgoriikkain 22.–25.3.2023. Válgabeaivve jietnavuoigadahtton oažžu jienastit dušše dan jienastanbáikkis, mii lea merkejuvvon jietnavuoigatvuođaregistarii ja jienasteaddjái boahtán almmuhankortii.
Jienasteaddji lea geatnegas ovdanbuktit válgadoaibmaolbmui čilgehusa identitehtastis. Dan gávnnaheami várás jienasteaddji berre ovdanbuktit fámus orru persovdnakoartta, pássa, vuodjenkoartta dahje Kela-koartta oktan govain. Dárbbu mielde boleslágádusas oažžu nuvttá persovdnakoartta jienasteami várás.
Riikkabeaiválggaid ovdajienasteapmi Ohcejoga gielddas dáhpáhuvvá ná:
Kirkosiiddas, gielddadálus, váldostivrasáles
- gaskavahko 22.3.2023 dmu 12.00–17.00
- duorastaga 23.3.2023 dmu 12.00–17.00
- maŋŋebárgga 28.3.2023 dmu 10.00–14.00
Gáregasnjárggas, máŋggadoaimmadálus, máŋggadoaimmasajis
- bearjadaga 24.3.2023 dmu 15.00–19.00
- lávvardaga 25.3.2023 dmu 10.00–14.00
Njuorggámis, máŋggadoaimmadálus, máŋggadoaimmasajis
- vuossárgga 27.3.2023 dmu 15.00–19.00
Lágádusjienasteapmi
Lágádusjienasteapmi lágiduvvo 23.3.2023 dmu 9.00–10.30 Ohcejoga rabasbálvalusguovddážis.
Ruoktojienastteapmi
Ovdajienasteapmái, mii dáhpáhuvvá ruovttus, sáhttá iežas almmuhit olmmoš, gean lihkadan- dahje doaibmannávccat leat hedjonan dan muddui, ahte son ii beasa jienastan- dahje ovdajienastanbáikái almmá govttohis váttisvuođaid haga. Oapmahašdikšu, guhte orru seamma dállodoalus ruoktojienasteapmái vuoigadahtton olbmuin, sáhttá jienastit ruoktojienasteami oktavuođas. Ruoktojienasteapmi lágiduvvo soahpamuša mielde áigodagas 22.3.–28.3.2023. Ruoktojienasteamis galgá dahkat almmuhusa čálalaččat dahje telefovnna bokte gieldda guovddášválgalávdegoddái maŋimuštá 21.3.2023 ovdal dmu 16.00 čujuhusain Utsjoen kunta, keskusvaalilautakunta, PL 41, 99981 Utsjoki dahje telefovnna bokte 040 1810 267/ Minna Lukkari dahje 040 181 0269/Raija Lehmonen.
Reivejienasteapmi
Válggaid áigge olgoriikkain ássi dahje orru jietnavuoigadahtton olbmot sáhttet jienastit olgoriikkas reivejienasteami bokte.
Jienastanbáikkit sotnabeaivve 2.4.2023 riikkabeaiválggain leat jienastanguovlluid mielde dát:
Jienastanguovlu: Jienastanbáiki:
002 Vuovdaguoika Gáregasnjárgga máŋggadoaimmadállu
003 Kirkosiida Ohcejoga gielddadállu
004 Njuorggán Njuorggáma máŋggadoaimmadállu
Válgadoaimmahus álgá válgabeaivve 9.00 ja joatkašuvvá boatkkaheamit dmu 20.00 rádjai.
Ohcejogas 9.3.2023
OHCEJOGA GUOVDDÁŠVÁLGALÁVDEGODDI