Vuokko Tieva-Niittyvuopioi Suoma Vilges Ruvssu ánsoruossa
27.4.2023
Váldostivrra ságadoalli Uula Tapiola ja Ohcejoga ovddeš gielddahoavda Vuokko Tieva-Niittyvuopio gudnemearkka geigendilálašvuođas duorastaga 27.4. / Govva: Ohcejoga gielda
Ohcejoga ovddeš gielddahovdii, giđđat 2022 virggistis ealáhahkii báhcán Vuokko Tieva-Niittyvuopioi lea juolluduvvon Suoma Vilges Ruvssu ánsoruossa.
Gudnemearkka lei Tieva-Niittyvuopioi evttohan Ohcejoga gielda. Gielda ákkastalai evttohusas dainna, ahte Tieva-Niittyvuopio lihkostuvai stáđásmahttit guhká ekonomalaš váttisvuođain gillán Ohcejoga gieldda ruhtadoalu measta 10-jahkásaš virgeáigodagas (2013–2022) áigge. Maiddái gieldda bálvalusat ja eallinfápmu ovdánedje ođđa láhkai su jođihanáigodagas.
Okta eanemus mearkkašahtti olahusain leamašan ođđa skuvla-máŋggadoaimmadáluid huksen Ohcejoga gieldda golmma giliguovddážii ja Gáregasnjárgga boarrásiidbálvalandálu huksenprošeakta. Dasa lassin Tieva-Niittyvuopio barggai gielddahoavdan erenoamáš aktiivvalaš ovddidanbarggu sámegiela ja -kultuvrra ovdii.
Gudnemearka addojuvvui Vuokko Tieva-Niittyvuopioi váldostivrra dilálašvuođas Ohcejoga gielddadálus. / Govva: Ohcejoga gielda
Gielddaráđđehusa ságadoalli Väinö Guttorm sávai Tieva-Niittyvuopioi lihku rásiiguin. / Govva: Ohcejoga gielda
Várreduopmár Vuokko Tieva-Niittyvuopio válljejuvvui njukčamánus 2022 Lappi buresveadjinguovllu guovllustivrii ja váldostivrra vuosttas várreságadoallin.
– Tieva-Niittyvuopio lea viidát servodagas fierpmáiduvvan ovddeš gielddahoavda ja várreduopmár, guhte lea nagodan ovddidit Ohcejoga ja sápmelaččaid áššiid hárvenaš máŋgga dásis, Ohcejoga gielda čállá ákkastallamiinnis.
Gudnemearka geigejuvvui Vuokko Tieva-Niittyvuopioi váldostivrra káfestallandilálašvuođas duorastaga 27.4.