Bures boahtin Ohcejoga giellaguovddáš Giellagárddi rahpandoaluide ja Laura Tapiola konsertii Ohcejohnjálmmi skuvlii dahje Teamsii 23.5!
18.5.2022
Bures boahtin Ohcejoga gieldda giellaguovddáš “Giellagárddi” rahpandoaluide Ohcejohnjálmmi skuvlii dahje Teamsii (liŋka) vuossárgga 23.5. d. 17–19.30!
Prográmma
17.00 Káfestallan
17.15 Giellagárddi rahpan
Rahpansánit
Sámegiela ealáskahttin Ohcejogas (Laura Arola)
Giellaguovddáža doaibmanplána (Kati Eriksen)
17.45 Ohcejoga giellabiras (Ánte Aikio)
18.15 Sámegiela ealáskahttin rávesolmmožin (Sini Rasmus)
19.00 Máttuid árdna -konsearta
(Laura Tapiola, Andreas Gundersen, Anna Näkkäläjärvi-Länsman)
Ohcejoga gieldda Deanuleagis sámástit -prošeavtta (Interreg Davvi 2020–2022) oktan váldoulbmilin leamaš vuođđudit Ohcejohkii sámi giellaguovddáža. Giellaguovddášdoaimmas lea guhkes historjá Norgga beale Sámis, muhto Suoma bealde sámi giellaguovddážat eai leat ovdal gávdnon. Giellaguovddáš lea sámegiela ealáskahttima guovddaš, mii lágida sámegillii giellaarenaid, ovddida gielabirrasa ja nanne gielalaš vuoigatvuođaid.
Ohcejoga gielda mearridii jagi 2022 bušeahttagieđahállamis vuođđudit giellaguovddaža. Giellaguovddaža nammagilvvu vuittii namma ”Giellagárdi”. Dál mii beassat ávvudit Giellagárddi rahpandoaluid! Dáhpáhusas gullat Giellagárddi plánaid ja Ohcejoga gielladili birra, sámegiela ealáskahttimis rávesolbmon ja Laura Tapiola juoigamin Máttuid árdna -luđiid. Dáhpáhus lea rabas buohkaide.