Gáregasnjárgii plánejuvvo ođđa divššodan- ja dearvvasvuođafuolahusa bálvalusaid guovddáš – huksenbargguid lea ulbmil álggahit jo dán giđa
19.1.2022
Hámusgovva Gáregasnjárgga ođđa bálvalanguovddážis. Govva: Arkkitehtitoimisto Jorma Paloranta Oy
Ohcejoga gielda ja MVH-Asunnot Oy ovddidit oktasašbarggus SámiSoster ry:in ja Aspa Palvelut Oy:in ođđa divššodan- ja dearvvasvuođafuolahusa bálvalusaid guovddáža Gáregasnjárgii.
Ohcejoga gielddas lea leamaš jo guhká dárbu lasihit ahkeolbmuid ja earáid beavttálmahtton bálvalanássama dárbbašeaddji ássiid bálvalusaid. Ohcejoga girkosiiddas lea okta ássanovttadat, muhto maid Gáregasnjárggas lea čielga dárbu bálvalanássama huksemii.
Gáregasnjárgga ođđa divššodan- ja dearvvasvuođafuolahusa bálvalusaid guovddážii lea ulbmil hukset buohkanassii 17 vistti, main fállojuvvo iešguđet dási ássanbálvalus; smávva láigovisttit unnit bálvalusaid dárbbašeaddjiide, muhto daidda geat dattetge háliidit bálvalusaid lahka sihke visttit birrajándor beavttálmahtton divššu dárbbašeaddji olbmuide. Ođđa visttiide bohtet maid doaktára ja eará sosiála- ja dearvvasvuođafuolahusa bargiid ođđaáigásaš bargansajit sihke doaimmahatlatnja SámiSoster-searvái. Searvvis lea lassin vejolaš geavahit dálu oktasašdoaibmalanjaid ja gievkkana iežas joavkodoaimmaide.
Guovddáža plánema vuolggasadjin lea leamaš sámekultuvrra ja báikkálašvuođa nana vuhtiiváldin. Dát boahtá oidnot earet eará visttiid oppalaš bajiloainnus sihke šilljobirrasis. Ássiid oktasašlanjaide bohtet oidnosii ohcejohkalaš dáiddáriid dáiddaduojit.
Hámusgovva Gáregasnjárgga ođđa bálvalanguovddážis. Govva: Arkkitehtitoimisto Jorma Paloranta Oy
Visttit leat huksejuvvon muoras ja daid energiijahápmin ávkkástallojuvvo eanaliekkasvuohta. Visttiid váldoplánejeaddjin doibme Arkkitehtitoimisto Jorma Paloranta Oy. Giddodagaid oamasta MVH-fitnodat, mii čatnasa doaibmat daid guhkesáigásaš láigoaddin.
Guovddáža bálvalanássama bálvalusaid boahtá buvttadit riikkaviidosaš Aspa-vuođđudusa oamastan Aspa Palvelut Oy. Aspa Palvelut Oy:s lea guhkes vásáhus ja oktasašbargu Ohcejoga gielddain Aspa-koti Goahti olis.
Ássama ruhtadan- ja ovddidanguovddáš ARA lea juolludan áigumuššii gaskaboddasaš projeaktavárrehusa ja loahpalaš ruhtadanmearrádus vurdo nannejuvvot giđa áigge. Guovddáža huksenbargguid lea ulbmil álggahit giđđat 2022 ja doaimma álgogease 2023.
Divššodan- ja dearvvasvuođafuolahusa bálvalusaid guovddáš buktá ođđa bálvalusaid lassin Ohcejohkii maid lasi divššodansuorggi bargosajiid sihke nanne gieldda eallinvuoimmi.