Gieldda searvedoarjagat leat juhkkojuvvon
3.7.2024
Ohcejoga gielddas leat dán jagi juohkán vuosttas háve searvedoarjagiid. Gieldda juolludan ruhtadoarjagiiguin doarjut ohcejohkalaš searve- ja álbmotdoaimma ja movttiidahttit gieldalaččaid searvvušlaš doaimmaide. Ruhtadoarjagat juolluduvvojit ohcejohkalaš dahje Ohcejogas doaibmi servviide, vuođđudusaide ja servošiidda. Giela juolluda ruhtadoarjagiid jahkásaččat dan mielde, man olu mearreruhta lea geavahan láhkai. Dán jagi bušeahttaárvalussii lei várrejuvvon 5000 €.
Ruhtadoarjagat juolluduvvojit guorahallama mielde. Ruhtadoarjagiid juolludeamis deattuhuvvojit aktiivvalaš ja plánejuvvon doaimmat, mat lasihit gieldalaččaid buresveadjima ja gieldda eallinfámu. Ruhtadoarjagiid ii sáhte ohcat seamma doibmii, masa soames eará lea juolludan ruhtadoarjaga. Lassin ovtta ohccái sáhttá dábálaččat juolludit dušše ovttalágan ruhtadoarjaga. Ruhtadoarjaga oažžuma eaktun lea beaividit dieđuid lähellä.fi bálvalussii.
Ruhtadoarjaga lei vejolaš ohcat 29.4.-17.5.2024, ja ohcamušat bohte oktiibuot gávcci, čieža iešguđet searvvis. Ohccojuvvon ruhtadoarjagiid submi lei oktiibuot 12 327 €.
Ruhtadoarjagat mieđihuvvojedje čuovvovaččat:
- Utsjokisuun kyläyhdistys-Ohcejotnjálmmi gilisearvi ry, doaibmandoarjja 700 €
- Šiella ry, doaibmandoarjja 500 €
- Nuorgamin Ikä-Sähly ry, čuozáhatdoarjja 500 €
- Ohcejoga gievrrat ry, čuozáhatdoarjja 500 €
- Badje-Sámit rs, čuozáhatdoarjja 600 €
- Utsjoen Kuohu ry, čuozáhatdoarjja 1000 €
- Utsjoen reserviläiset ry, doaibmandoarjja 1200 €
Giitu buot organisašuvnnaide ja servviide beroštumis ohcat searvedoarjagiid. Sávvat buohkaide somás bottuid iešguđegelágan áiggeájiin!
Jagi 2025 searvedoarjagiid sáhttá ohcat cuoŋománus 2025. Jagi 2025 ruhtadoarjagiid ohcama birra dieđihuvvo álgojagi 2025.