Gielddahoavdda virgái jearahallet golbma ohcci – okta ohcciin geassán ohcamušas eret
Beaiváduvvon 25.1.2022
Ohcejoga gielddahoavdda virgái jearahallet golbma ohcci.
Ohcejoga gielddaráđđehus mearridii čoahkkimisttis 17.1. bovdet njeallje ohcci jearahallamii gielddahoavdda virgái. Jearahallamiidda ožžo bovdehusa ohccit Päivi Aikasalo (filosofiija doavttir, Ohcejohka), Marja-Riitta Lukkari (hálddahusdiehtagiid magisttar, Helsset), Taina Pieski (filosofiija magisttar, Helsset) ja Esko Rautiainen (hálddahusdiehtagiid magisttar, Puolanka). Rautiainen goittotge gesii ohcamušas eret sotnabeaivve 23.1.
Ohcejoga gielddahoavdda virgái bohte mearreáiggis ovcci ohcamuša. Lassin okta olmmoš attii iežas miehtama virgái. Ohcanáigi nogai 31.12.2021.
Ohcejoga gielddaráđđehus jearahallá ovttas váldostivrra áirasiiguin golbma ohcci vuossárgga ođđajagimánu 31. beaivve. Jearahallamiid maŋŋá váldostivra mearrida gielddahoavdda válljemis seamma beaivvi áigge.
Ođđa gielddahoavdda sávvet váldit virggi dikšuma vuostá nu jođánit go vejolaš. Dálá gielddahoavda Vuokko Tieva-Niittyvuopio báhcá virggis eret guovvamánu loahpas.