Gielddahoavddas: Juovladearvvuođat
21.12.2022
Vássán jahki farga nohká ja mii ávvudit juovllaid.
Ođđa álgi jahki buktá máŋggalágan nuppástusaid gieldda doaimmaide, muhto sávaldahkan lea ahte nuppástusat eai olus oidno gieldalaččaid eallimis.
Lappi buresveadjinguovlu vástida ođđajagimánu álggu rájes Ohcejoga sode-bálvalusain. Seamma oahpes bargit jotket bargguin ja mihttomearrin lea doalahit bálvalusaid dálá dásis. Guhkit áigegaskkas nuppástusat leat vejolačča. Gielda joatká aktiivvalaš oktasašbarggu ja gulahallama buresveadjinguovlluin ja maiddái boahtte jagi mihttomearrin lea lagasbálvalusaid ja sámegielat bálvalusaid dorvvasteapmi.
Mii joatkit maid ovttas aktiivvalaš barggu fáhkkes ráhkadusnuppástusa badjel ceavzima ja gieldda eallinfámu nannema ovdii. Aiddo okto min eai leat lihkus guođđán. Lihkostuvaimet oažžut árvvoštallanvuloš stáhtadoarjaga bajádusa ja maid ruhtadeami Luossaguovddáža guoski čielggadeapmái oktiibuot badjel 400 000 euro. Dát lea buorre doarjja gieldda iežas doaimmaide vai eallinvuoibmi ja vearroboađut sturrot.
Váldostivra dohkkehii juovlamánu 15. beaivve jagiid 2023–2025 doaibma- ja ekonomiijaplána. Dárkkes euro politihkain lihkostuvaimet oažžut boahtte jahkái uhcánaš badjebázalaš bušeahta. Gárttaimet goit buot doaibmasurggiid goluid uhccudit, sávvamis dat oidno gieldalaččaid eallimis nu unnán go vejolaš.
Háliidan giitit gieldda bargiid vássán jagi áŋgiris barggus. Buohkat leat gártan njuovžilit bargat ja váidalahtti máŋggas sihkkarit menddo sakkage. Gielddas lea beakkán ja hui čatnašuvvan bargoveahka, mas gielddahoavdan lean giitevaš. Liekkus giitosat buohkaide buorre barggus.
Dáid juovllaid háliidan cealkit sierra giitosiid sosiála- ja dearvvasvuođa, sode-bargiide erenoamáš barggus Ohcejoga gieldda bálvalusas, dasgo sirdašuvvabehtet jahkemolsaga maŋŋá ođđa bargoaddi bálvalussii. Guhká bisti koronabaji áigge din bargu leamašan erenoamáš dehalaš, maid mii buohkat atnit árvvus. Máŋga gieldalačča muitalit leat iežaset duđavačča sode-bálvalusaide. Buot buori didjiide!
Lehkoset mis buohkain ráfálaš juovllat ja lehkos unna luopmu áhpásmahtti. Buriid juovllaid ja lihkolaš ođđa jagi buohkaide!