Guovloválggat 2022 Ohcejoga gielddas

 

Suomas lágiduvvojit ođđajagimánus 2022 vuosttas guovloválggat, main válljejuvvojit guovlostivrrat ođđa buresbirgenguovlluide. Dán rádjai gielddain leamašan ovddasvástádus sosiálafuolahusa, dearvvasvuohtafuolahusa ja gádjundoaimma ordnemis. Boahtteáiggis dain vástidit buresbirgenguovllut.

Lappi buresbirgenguovlu lágida sosiála- ja dearvvasvuohtafuolahusa ja maiddái gádjundoaimma bálvalusaid olles Lappis jagi 2023 álggu rájes. Buresbirgenguovllus lea iešstivrejupmi, ja dan alimus mearrideaddji orgána lea guovlostivra. Lappi buresbirgenguovllus guovlostivrii válljejuvvojit 59 áirasa.

Guovloválggat doaimmahuvvojit sotnabeaivve 23.1.2022. Eambbo dieđuid válggain gávnnat čujuhusas vaalit.fi/aluevaalit (suomagillii) ja sámegillii dáppe. Evttohasain gávnnat dieđuid válggaid diehto- ja boađusbálvalusas. Válggain dávjá jerrojuvvon gažaldagaid ja daidda vástádusaid oainnát dáppe. Lappi buresbirgenguovllus sáhtát lohkat eambbo dáppe. Ohcejoga jienasteamis fidnet lassedieđuid telefovnnain nummiris 040 181 0268.

Fuom! Jienasteaddji, guhte lea doaktára mearridan karantenas dahje erremis, ii oaččo boahtit sisa jienastanbáikái. Dákkár dáhpáhusain lea vejolaš jienastit jienastanbáikki šiljus dahje ovdajienasteami áigge ruovttus dihto eavttuiguin ja erenoamáš dorvodoaimmaiguin. Jeara dárbbu mielde eanet dieđuid telefovnnain nummiris 040 181 0268.

Guovloválggaid dehálaš beaivemearit

  • Válgabeaivi lea sotnabeaivi 23.1.
  • Ruovttus jienasteapmái almmuheapmi nohká 11.1. dmu 16.
  • Ovdajienasteapmi ruoktoeatnamis lea 12.–18.1.
  • Ovdajienasteapmi olgoriikkain lea 12.–15.1.
  • Guovlostivrrat álggahit barggu 1.3.
  • Boahttevuođas guovloválggat leat gieldaválggaid oktavuođas, čuovvovaš háve juo jagi 2025.

Guovloválggat 2022 Ohcejoga gielddas

Digi- ja álbmotdiehtovirgedoaimmahat ráhkada juohkehaččas jietnavuoigatvuođaregisterii váldojuvvon olbmos almmuhuskoartta ja sádde dan maŋimustá 30.12.2021 buohkaide daidda jietnavuoigadahtton olbmuide, geaid čujuhus lea dieđus. Jietnavuoigatvuođaregistera dieđut leat oaidnimis ja nuvttá fidnemis Digi- ja álbmotdiehto-virgedoaimmahaga mearridan báikkiin 13.12.2021 rájes. Olmmoš, guhte geahččá, ahte son lea vuoigatmeahttumit guđđojuvvon eret jietnavuoigatvuođaregisteris dahje sutnje guoski merkejupmi lea boastut, sáhttá dahkat vuigengáibádusa Digi- ja väestötietovirasto/Digi- ja álbmotdiehtovirgedoaimmahahkii maŋimustá 7.1.2022 dmu 16. Jietnavuoigatvuođaregister boahtá lágafámolažžan 11.1.2022 dmu 12 rájes.

Jietnavuoigadahtton sáhttá jienastit ovddalgihtii gos beare almmolaš ovdajienastanbáikkis ruovtturiikkas dahje olgoriikkain. Ovdajienasteapmi ruovtturiikkas ordnejuvvo 12.1.–18.1.2022 áigge ja olgoriikkain 12.–15.1.2022. Válgabeaivve jietnavuoigadahtton oažžu jienastit dušše dan jienastanbáikkis, mii lea merkejuvvon jietnavuoigatvuođaregisterii ja jienasteaddjái boahtán almmuhankortii.

Jienasteaddji lea geatnegas čájehit válgadoaibmaolbmui čielggadusa, gii olbmuid son lea. Dan gávnnaheapmin jienasteaddji galgá čájehit fámus orru persovdnakoartta, pássa, vuodjenkoartta dahje Kela-koartta, mas lea govva mielde. Dárbbašettiin poleslágádusas oažžu nuvttá gaskaboddosaš persovdnakoartta jienasteami várás.

Guovloválggaid ovdajienasteapmi Ohcejoga gielddas dáhpáhuvvá čuovvovaččat:

Kirkosiiddas, gielddadálus, váldostivrrasáles

  • gaskavahku 12.1.2022 dmu 12.00–17.00
  • duorastaga 13.1.2022 dmu 12.00–17.00
  • maŋŋebárgga 18.1.2022 dmu 10.00–14.00

Gáregasnjárggas máŋggadoaimmadálus, máŋggadoaimmalanjas

  • bearjadaga 14.1.2022 dmu 15.00–19.00
  • lávvardaga 15.1.2022 dmu 10.00–14.00

Njuorggáma máŋggadoaimmadálus, máŋggadoaimmalanjas

  • vuossárgga 17.1.2022 dmu 15.00–19.00

Lágádusjienasteapmi

Lágádusjienasteapmi doaimmahuvvo 13.1.2022 dmu 9.00–10.30 Ohcejoga rabasbálvalanguovddážis.

Ruoktojienasteapmi

Ruovttus dáhpáhuvvi ovdajienasteapmái sáhttá almmuhit iežas olmmoš, gean návccat lihkadit dahje doaibmat leat dan meare hedjonan, ahte son ii beasa jienastan- iige ovdajienastanbáikái almmá mearihis váttisvuođaid. Ruoktojienasteapmái vuoigadahtton olbmuin seamma dálus ássi oapmahašdikšu sáhttá jienastit ruoktojienasteami oktavuođas. Ruoktojienasteapmi doaimmahuvvo soahpamuša mielde 12.1.–18.1.2022 áigge. Ruovttus jienasteamis galgá dahkat almmuhusa čálalaččat dahje telefovnna bokte gieldda guovddášválgalávdegoddái maŋimustá 11.1.2022 ovdal dmu 16.00 čujuhusain:

Ohcejoga gielda, guovddášválgalávdegoddi
PL 41, 99981 Ohcejohka

dahje telefovnna bokte 040 181 0268/Birit Vuolab dahje 040 181 0267/Minna Lukkari.

Reivejienasteapmi

Válggaid áigge olgoriikkain ássi dahje orostalli jietnavuoigadahtton olbmot sáhttet jienastit reivviin olgoriikkain.

Jienastanbáikkit sotnabeaivve 23.1.2022 doaimmahan láhkai guovloválggain leat jienastanguovlluid mielde čuovvovaččat:

Jienastanguovlu / Jienastanbáiki:

  • 002 Vuovdaguoika / Gáregasnjárgga máŋggadoaimmadállu
  • 003 Kirkosiida / Ohcejoga gielddadállu
  • 004 Njuorggán / Njuorggáma máŋggadoaimmadállu

Válgadoaimmahus álgá válgabeaivve 9.00 ja joatkašuvvá gaskkalduvakeahttá dmu 20.00 rádjai.

 

Ohcejogas 10.12.2021

OHCEJOGA GUOVDDÁŠVÁLGALÁVDEGODDI


Eará ođđasat