Koronaráddjehusat ja -ávžžuhusat geahppánit Ohcejoga gielddas: Almmolaš máskaávžžuhus, galledeaddjiráddjehusat ja testengáibádusat nohket

2.5.2022

Koronaráddjehusat ja -ávžžuhusat geahppánit Ohcejoga gielddas.

THL lea heaittihan almmolaš máskaávžžuhusa, man dihte ávžžuhus nohká maiddái Ohcejoga gielddas. Máskaávžžuhus lea goit ain fámus THL rávvagiid mielde almmolaš sajiin siste ja johtolagas:

  • daidda, geat leat mannamin vejolaš koronanjoammuma dihte dikšui dahje testii.
  • daidda, geain leat vuoigŋaninfekšuvnna dávdamearkkat, muhto fertejit johtit ruovttu olggobealde.
  • daidda, geat dihtet iežaset gártan njoammunvára vuollái (omd. bearrašis lea gávnnahuvvon koronanjoammun) eaige sáhte garvit lagaškontávttaid ruovttu olggobealde.

Máskaávžžuhus lea ain fámus maiddái Ohcejoga dearvvasvuođaguovddážis, gohcimis, seaŋgaossodagas ja bálvalanássama ovttadagain. Rávvehaga ja hállan-, doaibman- ja fysioterapevtta áššehasaid ja bargoveaga máskka geavaheapmi ii leat šat vealtameahttun. Juohkehaš sáhttá goit ain geavahit máskka, jos hálida, omd. siste dalle, go lagaškontávttaid lea váigat garvit.

Dearvvasvuođafuolahusa bargoveaga testen nohká. Maiddái seaŋgaossodaga gussiid testengáibádus heaittihuvvo. Seaŋgaossodaga ja bálvalanássama ovttadagaid galledeaddjiid ávžžuhit goit ain dahkat ruoktoteastta ovdal galledemiid. Oahpásmuva maiddái seaŋgaossodaga, Dorvvu, Seitakartano ja Aspa almmolaš galledanrávvagiidda.

Mánát sáhttet oassálastit árrabajásgeassimii ja skuvlaoahpahussii, vaikko bearrašis livččii koronanjoammun, jos sis alddiset eai leat infekšuvnna dávdamearkkat. Árrabajásgeassimis ja skuvllain ii leat almmolaš máskaávžžuhus. Máskka sáhttá goit ain geavahit álo go hálida.

Lappi guovlluhálddahusdoaimmahaga mearrádus lanjaid dearvvasvuođadorvvolaš geavaheamis lea nohkan, man dihte maiddái Ohcejoga gieldda lihkadan- ja kulturbáikkiid, omd. álša- ja lihkadansáliid, vuojadanhálla ja ealligovvateáhter Davvenástti galledeaddjiráddjehusat nohket.

Ohcejoga gielddadoaimmahaga uvssat leat vuot 2.5. rájes rabas dábálaččat árgan dmu 9–15.

Koronavirusnjoammumiid eastadeapmin lea ain dehálaš fuolahit buorre giehta- ja gossanhygienas ja dorvogaskkain. Jos navddát alddát koronavirusinfekšuvnna, leat gártan njoammunvára vuollái dahje dahkan positiiva ruoktoteastta, čuovo Ohcejoga gieldda doaibmarávvagiid.

 

2.5.2022
Leena Niittyvuopio-Jämsä, vs. vástideaddji doavttir, Ohcejoga dearvvasvuođaguovddáš


Eará ođđasat