Mateusz loaktá Ohcejogas erenoamážit: Čáppa ja dorvvolaš giláš lea addán buriid rámaid fitnodatdoallivuhtii nugo bearašeallimiige

Govva: Sonja Sistonen / Ohcejoga gielda

Huksensuorggi fitnodatdoalli Mateusz Moilanen fárrii Ohcejohkii 2016. Albmá ruohttasat leat Suomussalmis. Son lei beassan oahpásmuvvat gildii vuosttas geardde logenár jagi ovdal bargoreaissustis.

– Bohten deike bargotuvrii 2007 ja seammá reaissus fitnen vuosttas geardde luossabivddus. Dalle bohciidii munnje ahte vau, dát lea nu čáppa ja fiinna báiki, ahte deike mun gal boađán nuppesge – ja nu das dasto geavaige!

Jagiid mielde Ohcejohka šattai oahpisin ohcejohkalaš eamida ánssus.

– Mu eamit lea dáppe eret ja manaime Ohcejogas álo geasset. Oruime dalle Avvilis. Ohcejohka orui juohke galledeamis ain eanet´eanet ruovttolágážin, muhto fárrema deike moai ean vihkkehallan ovdalgo vuohppa dan dasto oktii evttohii.

– Eamit bijai eaktun ahte vuolgit, jus lihkostuvve vuovdit dállomet Avvilis. Golmma mánotbaji geahčen leimmet Ohcejogas!

Ohcejoga áššehasat leat sihke addán barggu ja viiddidan fitnodaga

Fárrema mielde párragoddi gárttai álggus njuiket dušši ala, go diehtu bargosajiin Ohcejogas ii vel lean.

– Sivusteame dovddaime, ahte mearrádus lea goittotge riekta ja jáhkku dasa ahte ovttas birget, attii roahkkatvuođa nuppástussii.

Dalle Mateusz barggai fitnodatdoallin huksensuorggis rehketčállinfitnodaga bokte. Son dagai álggus bargoreaissuid Avvilii dassážiigo Ohcejogasge álge leat barggut eanetge.

– Ledjen bargan fitnodatdoallin rehketčállinfitnodaga bokte birrasii njeallje jagi ja Ohcejogas láddagođii jurdda iežan fitnodaga ceggemis. Vuođđudin oasussearvvi 2018.

Govva: Sonja Sistonen / Ohcejoga gielda

Maalaus & Rakennus Moilanen Oy lea huksensuorggi fitnodat man doaibmasuorgái gullet huksen, remonteren ja málenbarggut ja buot daidda laktáseaddji barggut viidát. Vaikko lea gilvu, máŋggabealat bálvalanválljenmunni ja alla kvalitehtadássi leat dáhkidan, ahte bargguide lea jearaldat.

– Munnje alccen deháleamos vuolggasadji lea, ahte bargu lea alladását. Barggu buorre ámmátlaš boađus hállá iežas bealis ja dán dágun maiddái iežan bargiide, das in hálit addit vuollái. Gilvoovddu gáldun anán dan, ahte min kvalitehtii sáhttá luohttit, dat lea hiđis márkanfievrrideapmi mii buktá álo ođđa fálu.

Maŋimuš njeallje jagi fitnodahkii leat addán barggu aivve Ohcejoga guovllu áššehasat. Áššehassan leat priváhtaolbmot nugo fitnodagatge.

Fitnodat addá barggu dál Mateusza lassin golmma bargái, geat buohkat leat ohcejohkalaččat. Dat ahte sáhttá iežas fitnodagas addit barggu maiddái earáide, ja vel báikegottálaččaide, lea barggu máŋggabealatvuođa lassin okta deháleamos áššiin, mii movttiidahttá fitnodatdoalli.

Govva: Sonja Sistonen / Ohcejoga gielda

– Eanemus iežan barggus movttiidahttá dat ahte oaidná iežas barggu bohtosa ja dat, ahte álo sáhttá ovdánahttit bargoteknihkaid ja geahččalit buoret loahppabohtosii. Molsašuddi bargoeatnamat ja iešguđetlágan bargomuttut doalahit maiddái beroštumi. Áigi hurgá jođánit go bargobeaivvis lea muttágit hástalus.

– Mu mielas orru buorre maiddái addit barggu earáide. Dat lea okta dán hommá sálttiin – sáhttá buktit iežas fitnodatdoaimmain maiddái servodatlaš bidjosa, Mateusz suokkardallá.

Astoáigge meahccebivdoáiggeádji veahkeha doalvut jurdagiid bargguin

Fitdodatdoallivuođas leat maiddái iežas hástalusat. Mateusza beaivvit leat guhkit, bargobeaivi lea álkit 10–12 diimmu guhkkosaš. Bargobeaivi dávjá joatkašuvvá báberbargguin vel dan maŋŋá, go joavdá ruoktot.

– Bargu lea lossat go barggan fitnodagas ieš maiddái rumašlaš barggu bargoeatnamiid jođiheami, barggu organiserema, gálvodiŋgomiid ja báberbargguid lassin. Dál go mus leat maiddái bargit, lea dasage laktáseaddji bargomearri lassánan čielgasit. Fitnodatdoallivuohta leage vuosttamuččat eallinvuohki: nohkat ja lihkat iežas fitnodaga nammii. Jus dasa ii leat gearggus, de lea dušši álgit fitnodatdoallin.

Astoáigge jurdagiid lea buorre gáidadit bottažii bargoáššiin. Dasa veahkehit áiggeájit main lea beroštuvvan.

– Dalle go luosa beasai bivdit, dat lei mearkkašahtti heaggaráigi. Dan báras beasai veháš áigái ollásit eret buot áššiin. Dál go dat ii leamaš, lean ovdamearkka dihte meahcástan ja ovddeštan tráktora, Mateusz muitala.

“Ráfálašvuohta, dorvvolašvuohta ja luondu dahket Ohcejogas hui erenoamáš báikki ássat”

Ohcejohka lea Mateusza mielas áibbas áidnalunddot báiki luonddus bealis. Ássanbáikin Ohcejohka heive su mielas bures maiddái nammejahkii dakkáriidda, geat atnet árvvus iežas ráfi ja dorvvolaš ássanbirrasa.

Govva: Sonja Sistonen / Ohcejoga gielda

– Persovnnalaččat munnje alccen leat mávssolaččat ráffi, dorvvolašvuohta ja dat, ahte dáppe lea ávgat. Go in leat miige gávpotolbmuid ja luondu lea dáppe duođaid fiinnis, nuba dát leat buohkanassii munnje erenoamáš báiki ássat. Loavttán oktoge ja dáppe sáhttá álkit leat barggakeahttá maidige, dušše leat ja návddašit.

Dušše luonddu fállan čáppa dilit eai goittotge leat nuvván doarvái gieldda geasuhandahkkin, Mateusz suokkardallá. Son atná ealáhuseallima ovdánahttima ja fitnodatdoallivuođa doarjuma erenoamáš dehálaš áššin Ohcejoga dáfus.

– Vearroboađuid lassin dárbbašuvvo fitnodatdoaibma, erenoamážit bargofápmodili doalaheami hástalusaid geahččanguovllus.

Ohcejoga skábma lea dakkár masa Mateuzs ii leat vel ollásit hárjánan. Son lea fuomášan ahte dálveguovdilmánotbajiid áigge searaid bajásdoallamii galgá rahčat eanet. Das fuolakeahttá eallin Ohcejogas lea eanet go eallinveara.

– Ohcejohka lea addán munnje ollu. Dat lea addán vejolašvuođa fidnošit ja lihkostuvvat das. Dan bokte lean oahppan duođaid ollu áššiid bargoeallima, olbmuid nugo iežange birra.

– Iežan eallima boađán dáppe eallit ja dáppe ássat, inge dáppe vuolgge jus ii leat bággu. Deike lean huksen iežan eallima bearrašiinnán ja nu lea áigumuš dahkat boahttevuođasge.

Ohcejoga gielda buvttada Ohcejohkalaččaid eallin -muitalusráiddu, mas vuodjut olbmuid jurdagiidda ja vásáhusaide eallimis Suoma ja Eurohpa uniovnna davimus gielddas. Almmustahttit ráiddu ođđajagimánu 2023 rájes. Gávnnat buot almmustuvvan osiid dáppe!