Norggas gehččet dál Suoma guvlui
23.9.2022
Ealáhusdoaimmas fitne čakčamánu álggus vurdon guossit Nuorta-Finnmárkkus ja Kárášjogas. Guossit bohte Várggága, Čáhcesullo ja Kárášjoga gielddain, Sámi Ealáhus- ja Guorahallanguovddážis (SEG), Romssa ja Finnmárkku fylkkain, Nuorta-Finnmárkku ráđis ja Ernst & Young -konsultafitnodagas.
Galledeami ulbmilin lei ealáskahttit gulahallangaskavuođaid koronajagiid maŋŋá ja smiehttat ovttas sihke min guovllu hástalusaid ja maiddái dan givrodagaid ja vejolašvuođaid. Hálešteimmet maiddái ovddidanprošeavttain, mat leat jođus, ja das mo sáhtášeimmet boahttevuođas bargat ovttasbarggu nu, ahte das livččii nu olu ávki go vejolaš min olles guovllu ealáhusaide.
Gávnnaheimmet, ahte oktasaš hástalussan lea earret eará álbmotráhkadusa nuppástus, čeahpes bargiid rekryteren ja turismma sesoŋŋalunddotvuohta. Maiddái Nuorta-Finnmárkku ja Kárášjoga gielddain ássit geahppánit ja boarásmuvvet ja dan dihtii lea dárbu hutkat vugiid buoridit geasuhan- ja bisuhanfámu. Bargiid gávdnomis leat váttisvuođat maiddái Davvi-Norggas, vaikko Norggas dorjotge iešguđetge láhkai olbmuid davvin bissuma. Davvi guovllu iešvuođat ja molsašuddi dálkkit leat olbmuid mielas dávjá fuones bealit, muhto sáhtášiigo čoaska ja arvves dálkkádat leat maiddái geasuhanfápmu, go dálkkádatnuppástus ovdána ja báhkka dálkkit lassánit Eurohpás ja miehtá máilmmi?
Nuorta-Finnmárkkus leat ovdal čatnan čavgadut ovttasbarggu Ruoššain, muhto Ruošša dili nuppástuvadettiin Norggas gehččet dál Suoma guvlui. Ovttasbargovejolašvuođaid oidnet ovdamearkka dihtii rájáid rasttildeaddji bálvaluspáhkaid ovddideamis ja buktagahttimis, oktasaš guovllulaš márkanastin- ja brándakampánnjain ja oktasaš ovddidanprošeavttain. Suokkardalaimet maiddái dan, makkár vejolašvuođaid Suoma NATO-lahttuvuohta sáhtašii mielddisbuktit. Aŋkke dat lasiha ain norgalaččaid beroštumi Supmii ja dahká ovttasbarggu ovddideami njuovžilabbon.
Ohcejogas álgán geaidnosihkkelastinturismma ovddidanprošeakta bovttii erenomážit beroštumi. Sihkkelastinjohtolagaid joatkin Norgga beallai ja johtolagaid ja daid oktavuođas leahkki bálvalusaid oktasaš márkanastima navdet hui miellagiddevaš vejolašvuohtan. Maiddái kultuvrraid buoret ovdanbuktin suokkardallojuvvui oassin vásttolaš turismma ovddideami, sihke sámekultuvrra ja kvenakultuvrra dáfus. Suopmelaččaid máhttu vásttolaš turismma suorggis oaččui olu rámi ja Norggas leat hui beroštuvvan oahppat mis. Kárášjogas oidnet vejolašvuođaid maiddái busseturismma aktivitehtaid hárrái, ovdamearkka dihtii johkafatnasiid hámis.
Lea somá fuobmát, ahte Norggas leat dál hui beroštuvvan guovllulaš ealáhusaid ovttasbarggus Suoma beale doaibmiiguin. Buot oassebealit deattuhedje dilálašvuođas dan, ahte ovttasbargu ii oaččo báhccit dušše sáhkan, muhto mii galgat maiddái duohtan dahkat dan, man birra leat háleštan. Gielddat ja ráđit sáhttet dahkat ovttasbarggu vejolažžan ovdamearkka dihtii nu, ahte dat ordnejit Suoma ja Norgga beale fitnodatdoalliid deaivvademiid. Dát bargu lea dál álggahuvvon ja čuovvovaš doaimmaid birra addit dieđu gieldda kanálain.
Ohcejoga gieldda ealáhusdoaimma beales deaivvadeamis ledje mielde dát prošeavttat:
uKoordinaatio – Ohcejoga ráhkadusnuppástusa koordineren /Utsjoen rakennemuutoksen koordinointi
TENO outdoor – Sihkkelastinturismma ovddideapmi Deanuleagis/ Pyörämatkailun kehittäminen Tenojokilaaksossa
uDigi – Ohcejoga digitála eallinfápmu/ Utsjoen digitaalinen elinvoima
Sápmelaš kulturárbbi nannen Deanuleagis/ Saamelaisen kulttuuriperinteen vahvistaminen Tenojokilaaksossa.
Gávnnat lasi dieđu prošeavttaid birra dáppe.
Lassedieđut:
Taru Lindell
Prošeaktahoavda
uKoordinaatio -prošeakta
+358 40 154 3649