Oahpahusráđđehusa Cygnaeus-bálkkašupmi Ohcejoga gieldda ja Sámedikki oktasaš sámegielaid gáiddusoahpahusprošektii

Oahpahusráđđehusa Cygnaeus-bálkkašupmedoaibmagoddi válljii sámegielaid gáiddusoahpahusa pilohttaprošeavtta oktiibuot 29 evttohusa ja guđa finalistta joavkkus.

 

Oahpahusráđđehus lea bálkkašan Ohcejoga gieldda ja Sámedikki oktasaš sámegielaid gáiddusoahpahusprošeavtta jagi 2020 Cygnaeus-bálkkašumiin.

Bálkkašupmi juhkkojuvvui vuossárgga 23.11.2020 neahtas lágiduvvon ávvudilálašvuođas. Bálkkašumi geigii Oahpahusráđđehusa váldohoavda Olli-Pekka Heinonen.

Cygnaeus-bálkkašupmi addojuvvo jahkásaččat ovttaskas olbmui, prošektii dahje servošii, mii lea ovddidan dásseárvosaš ja ovttaveardásaš oahppanvejolašvuođaid Suomas. Bálkkašumi kritearain deattuhedje dán jagi doaibmanvugiid, mat ovddidit oasálašvuođa, olahahttivuođa ja inklušuvnna.

Prošeaktahoavda Hanna Helander Ohcejoga gielddas ja koordináhtor Arla Magga Sámedikkis illudeaba dán dehálaš dovddastusas.

– Dát lea dehálaš fuomášupmi prošektii, mii lea leamašan jođus ja ovddidan doaimmaidis easkka moadde jagi, dadjá Helander.

– Mii sávvat, ahte diehtu sámegielaid oahppanvejolašvuođas olles riikkas oažžu bálkkašumi geigema maŋŋel eanet fuomášumi, illuda Magga.

Prošeakta fállá sámegielaid ja -kultuvrra oahpahusa miehtá Suoma

Sámegielaid gáiddusoahpahusprošeakta lea lágidan čavčča 2018 rájes anáraš-, nuortalaš- ja davvisámegiela oahpahusa sámiid ruovttuguovllu gielddaid olggobeallái.

Ohppiidlohku lea lassánan jahkásaččat mottiinlogiin, nu ahte dál oahpahusas leat sullii 90 oahppi ja studeantta oktiibuot 67 skuvllas. Ovttasbarggus leat mielde 36 oahpahusa ordnejeaddji. Prošeavtta oahpaheaddjin barget dán lohkanjagi Henna Aikio, Satu-Marjut Nieminen, Joni Saijets, Sirkka Sanila ja Sonja Moshnikoff.

Prošeakta fállá Suomas hubmojuvvon sámegielaid ja sámekultuvrra oahpahusa miehtá Suoma. Seammás dat ovddida namalassii dán oahpahussii vuogas gáiddusoahpahuspedagogihka. Prošeavtta oahpahusas leat mielde earret eará máinnasteapmi ja stohkosat.

– Maiddái luondopedagogihka sáhttá geavahit oahpahusas, muitala Helander.

Prošeavtta loahpalaš mihttomearrin lea stáđásmahttit sámegielaid ja sámegielat oahpahusa olles riikkas, muitala Sámedikki skuvlenčálli Ulla Aikio-Puoskari.

– Gáiddusoahpahusa ovddidanprošeakta lea vuosttaš lávki dán barggus. Prošeakta joatkašuvvá jagi 2021 lohppii. Dan maŋŋel vuordimis lea, ahte doaibma joatkašuvvá bissovaš doaibman.

Prošeavttas leat dán dilis davvisámegiela oahpahusas oktiibuot 45, anárašgielas 27 ja nuortalašgielas 18 oahppi. Vaikko ohppiidmearri lea oppa áigge sturron, ii dat leat vuos doarvái.

– Lea vel ollu bargu vai mii sáhttit sihkkarastit sámemánáide ja -nuoraide ovttaveardásaš vuoigatvuođa iežas giela oahpahussii. Mii ovddidit dál oahpahusa gáiddusin ja seammás min ulbmilin lea oažžut nu alla dási ja pedagogalaččat bures plánejuvvon ollislašvuođa go vejolaš, muitala Arla Magga, guhte lea bargan prošeavttas dan álggu rájes.

Prošeakta válljejuvvui oktiibuot 29 evttohusa ja guđa finalistta joavkkus

Cygnaeus-bálkkašupmi lea juhkkojuvvon jagi 1981 rájes. Skuvlaráđđehus vuođđudii bálkkašumi gudnejahttit Suoma oahppogeatnegasvuođa áhči Uno Cygnaeus (1810–1888) muittu. Skuvlaráđđehus heaittihuvvui jagi 1991, ja dan sadjái vuođđuduvvon Oahpahusráđđehus jotkkii bálkkašumi addima. Bálkkašumi geigenvuođuštusat ođasmahttojedje jagi 2019. Cygnaeus-bálkkašumiin addojuvvo fuomášupmi dál dásseárvui ja ovttaveardásašvuođa ovddideaddji doaimmaide.

Oahpahusráđđehusa Cygnaeus-bálkkašupmedoaibmagoddi válljii sámegielaid gáiddusoahpahusa pilohttaprošeavtta oktiibuot 29 evttohusa ja guđa finalistta joavkkus. Bálkkašumi válljiiga dán jagi prošeaktaáššedovdi Michaela Moua vuoigatvuohtaministeriijas ja professor Markku Jahnukainen Helssega universitehtas.

Lassidieđut:

Hanna Helander, projeaktahoavda

hanna.helander@edu.utsjoki.fi

tel. 040 7012 094

 

Arla Magga, projeaktakoordináhtor

arla.magga@samediggi.fi

tel. 040 1985 033

 

Ulla Aikio-Puoskari, skuvlenčálli

ulla.aikio-puoskari@samediggi.fi

tel. 040 767 3101


Muita uutisia