Ohcejoga gielda cealká Suoma ja Norgga ministeriijaide: Deanu luossanáliid ealáskahttima ovdii galgá bargat buoret ovttasbarggu ja doaimmaid jo mearraguovlluin
28.3.2022
Ohcejoga gielda gáibida Suoma ja Norgga ministeriijain eanet ja buorebut plánejuvvon ovttasbarggu Deanu luossanáliid ealáskahttima ovdii.
Ohcejoga gielda lea addán Deanu boahtte gease guolástanmearrádusain cealkámuša Suoma eana- ja vuovdedoalloministeriijai ja Norgga dálkkádat- ja birasministeriijai. Cealkámušas gielda deattuha rivttessturrosaš luossabivdoráddjehusaid mearkkašumi luossanáliid ealáskahttinbarggus, muhto fuopmášahttá, ahte ráddjehusat okto johkaguovlluin leat beaktilmeahttumat, jos luossabivdu ii ráddjejuvvo mearraguovllus. Luossanáliid dili galggašiige gieldda mielde geahččalit buoridit vuosttas sajis luossaveajehiid borri boraguliid bivdduin, dálkkádatnuppástusa váikkuhusaid geahpedemiin ja luosa ja dan biebmoealliid mearrabivdui váikkuhemiin.
Suopma ja Norga leat Deanu luossanáliid rašes dili dihtii evttohan, ahte Deanus oaččošii boahtte gease bivdit luosa dušše hui ráddjejuvvon áiggi árbevirolaš bivdosiiguin, buođuin njeallje jándora ja firpmiin guokte jándora 4.–13. suoidnemánu. Ohcejoga gielda fuopmášahttá, ahte máŋggaid sivaid dihtii dákkár ráddjehusat eai atte báikkálaččaide albma vejolašvuođa árbevirolaš buođđo- ja fierbmebivdui. Gielda oaivvildage, ahte Deanu guolledoalloguovllu ja TF (Norgga guovlohálddahus) oktasaš evttohus das, ahte báikkálaš guolástanvuoigatvuođaid oamasteaddjit oaččošedje bivdit luosa guhtta jándora golmma vahku áigge 26.6. rájes, doarjjošii buorebut árbevirolaš luossabivdokultuvrra seailuma ja seammás dagašii vejolažžan gáhttet luossanáliid. Gielda atná dehálažžan, ahte báikkálaččaide addojuvvo lohpi maiddái ráddjejuvvon stággobivdui.
Lassin Ohcejoga gielda muittuha cealkámušastis áššiid rabas válmmaštallama ja albma gullama mearkkašumis Deanu guolástanráddjehusaid válmmaštallanbarggus erenomážit dalle, go ráddjejit sápmelaččaid ja guolástanvuoigatvuođaid oamasteaddjiid vuođđovuoigatvuođaid ollašuvvama. Gielda čálláge Suoma ja Norgga ministeriijaide, ahte geasi 2023 guolástanmearrádusaid válmmaštallamis galget várret eanet áiggi báikkálaš servoša gullamii.
Ohcejoga gieldda cealkámuša ministeriijaide sáhttá lohkat ollásit dákko.
Lassedieđut:
Taina Pieski
Gielddahoavda
Ohcejoga gielda
+358 50 535 1574
taina.pieski@utsjoki.fi