Ohcejoga kránnjágieldda Kárášjoga koronadilli lea hedjonan – Ohcejoga gieldalaččaid ávžžuhit leat finakeahttá Kárášjogas ja válddihit teastta jo láivves dávdamearkkaid geažil
8.11.2021
Ohcejoga kránnjágielddas Kárášjogas lea koronadilli futnon maŋimuš vahkuid áigge. Kárášjoga gieldda odná dieđáhusa mielde leat doppe jo 38 olbmo erremis koronavirusinfekšuvnna geažil (dilli 8.11.2021). Sullii bealli dain, geat leat buohccán, leat ožžon guokte koronaboahkuhusa.
Ohcejoga gielda ávžžuha garvit Kárášjogas fitnama, jos beare vejolaš. Daid Kárášjogas fitnan olbmuid, geat eai leat boahkuhuvvon korona vuostá dahje geain lea beare nubbi boahkuhus, ávžžuhit fitnat koronateasttas Ohcejoga gildii máhcadettiin ja nuppi koronateasttas 3–5 jándora máhccama maŋŋá. Dan botta ávžžuhit geavahit máskka buot ruovttu olggobeale johtimiin ja fuolahit maid buorre giehtahygienas. Daid, geat johtet rájá rastá jeavddalaččat (omd. barggu geažil), ávžžuhit fitnat koronateasttas sullii oktii vahkus. Ávžžuhus ii guoskka daid, geat leat boahkuhuvvon guktii korona vuostá. Sii eai dárbbaš fitnat teasttas.
Jo láivves koronadávdamearkkaid sivas galgá fitnat koronateasttas nu jođánit go vejolaš. Dát guoská maid sin, geat leat boahkuhuvvon guktii korona vuostá. Bargui, skuvlii dahje beaiveruktui ii galgga mannat, jos leat infekšuvnna dávdamearkkat.
Gáregasnjárggas sáhttá várret áiggi koronatestii tel. 040 758 2076, dearvvašvuođadivššár Indira Niittyvuopio. Ohcejogas koronateasttat dahkkojuvvojit Ohcejoga dearvvašvuođaguovddážis, áiggi várren árgan tel. 040 181 0285, eahkediid ja vahkuloahpaid áigge tel. 040 181 0281. Ohcejoga gielddas lea geavahusas jođánisteasta, man boađus gárvána 15 minuhtas.
Dasa lassin muittuhit buohkaid koronadorvvolašvuođarávvagiin:
- Muitte dorvogaskkaid
- Geavat máskka omd. gávppis finadettiin
- Fuolat giehtahygienas
- Jos dus leat infekšuvnna dávdamearkkat dahje buohccát, de mana Covid-19-testii
Jos it leš vel váldán koronaboahkuhusa, de dasa sáhttá várret áiggi tel. 040 758 2076 dahje tel. 040 758 2073! Koronavirusboahkuhus lea dorvvolaš ja suddje bures garra koronavirusinfekšuvnnas.
8.11.2021
Heidi Eriksen, njoammudávddáin vástideaddji doavttir