Ohcejohka beaiváda gieldastrategiija boahtte dálvve ovttas gielddaássiiguin
5.10.2022
Ohcejoga gielddas álgá gieldastrategiija beaivádanbargu. Gieldaláhka mearrida gielddaid beaivádit strategiija oktii váldostivrabajis.
Ohcejoga gieldda vuosttas strategiija dohkkehuvvui jagis 2017. Dan ollašuhttima oinnolamos boađus leat ođđa skuvla-máŋggadoaimmadálut gieldda golmma giliguovddážis sihke sámi giellaguovddáža, Giellagárddi vuođđudeapmi.
Máilbmi lea goit rievdan sakka ovddit strategiijabarggu maŋŋá, ja nuppástusain leamašan stuorra váikkuhusat maiddái Ohcejoga gildii, gávnnaha gielddahoavda Taina Pieski.
– Deanu luosa bivdogildosa dagahan fáhkkes ráhkadusnuppástus, COVID-19 pandemiija váikkuhusat guovllu rádjagávpái ja turismii sihke maŋimuš áššin Ukraina soađi dagahan energiijakriisa leat dolvon dasa, ahte ekonomalaš doaimmalašvuođa lea váttis einnostit. Dás leamašan njuolggo váikkuhus gieldda olbmuid buresveadjimii.
– Lassin SODE-bálvalusat sirdásit buresveadjinguovlluide 2023 jagi álggus, goas gieldda rollas deattuhuvvá eallinfámu ja čuvgehusdoaimma ovddideapmi, Pieski lasiha.
Maŋimuš jagiid stuorra doajáhagat leat oahpahan, ahte einnostahttivuohta lea geahppánan máilmmis, fuopmášahttá eallinfápmohoavda Tanja Lepistö. Lea oaivil váldit dán vuhtii strategiijabarggus.
– Jáhkán ahte ođđa váivves ja vuorddekeahtes áššit dáhpáhuvvet maid boahttevuođas. Danin livččii dehálaš guorahallat čuovvovaš strategiijas, mo Ohcejohka sáhttá leat dás ovddos jođánut ja vuogáiduvvat buorebut nuppástuvvi máilmmis.
– Ohcejoga nanusvuođat leat erenomáš luondu, ealli sámekultuvra ja buorre sajádat Norgga Finnmárkku ekonomiijaguovllu lahkosis. Go dáid nanusvuođaiguin máhttá rivttes vugiin ávkkástallat, de sáhttá buoridit Ohcejoga vuogáiduvvannávcca, vihkkedallá Lepistö.
Gielda hálida gielddaássiid mielde strategiija plánemii
Ohcejoga gielda hálida gieldda olbmuidis oassálastit viidát strategiijabargui. Ságastallamiid ođđa strategiija birra čađahit boahttevuođaforumiin, maid ordnejit boahtte dálvve áigge. Nana figgamuššan lea addit strategiijabarggus jiena buotahkásaš gieldalaččaide iešguđetlágan duogážiin.
– Mii hálidat gullat, makkár lea buorre boahttevuođa gielda nu ássiid, fitnodagaid, boazo- ja guolledoalu ovddasteaddjiid go gieldamearrideaddjiidge mielas, muitala gielddahoavda Taina Pieski.
Ohcejoga ođđa gieldastrategiija buktojuvvo váldostivrii dohkkehanláhkai boahtte giđa ja dat boahtá fápmui jagi 2024 álggu rájes.
Lassedieđut:
Gielddahoavda Taina Pieski
Ohcejoga gielda
taina.pieski@utsjoki.fi
050 535 1574
Eallinfápmohoavda Tanja Lepistö
Ohcejoga gielda
tanja.lepisto@utsjoki.fi
0400 151 294