RAI-vuogádaga atnuiváldin Ohcejogas – dieđáhus ahkeolbmuid bálvalusaid áššehasaide

14.9.2022

Buorre ahkeolbmuid bálvalusaid áššehas, mii váldit gieldamet ruoktodivššus sihke ássanbálvalusain atnui RAI-árvvoštallanveahkkeneavvu. Muitalat dán dieđáhusas dutnje eanet RAI-veahkkeneavvus.

Maid RAI-árvvoštallan oaivvilda?

RAI-árvvoštallamis dutnje nammaduvvon divššár dahje eará olmmoš árvvoštallá du doaibma- ja eará návccaid. Son maiddái vihkkedallá, makkár bálvalusaiguin sáhttá buoremusat doarjut aiddo du. Árvvoštallamis geavahit gažaldagaid, muhto dat lea eanet goit ovttas ságastallan. Sáhtát muitalit iežat eallimis ja dutnje dehálaš áššiin.

Manin dutnje dahkkojuvvo RAI-árvvoštallan?

Boarrásiidbálvalanláhka geatnegahttá RAI-árvvoštallama geavaheami miehtá Suoma. RAI-árvvoštallama vehkiin beasat muitalit, mo árgaeallin dus manná. Sáhtát maiddái ieš buktit ovdan, makkár veahki ja doarjaga dárbbašat. Du divššár jearrá dus hui máŋggalágan áššiid ja ná dutnje lea álkit oažžut aiddo dakkár doarjaga ja bálvalusaid, maid don dárbbašat.

Geat oassálastet RAI-árvvoštallamii?

Du iežat divššár vástida RAI-árvvoštallama dahkamis. Árvvoštallamii sáhttet dárbbu mielde oassálastit maiddái eará ámmátolbmot, geat oassálastet du dikšui. Eará ámmátolbmot sáhttet leat ovdamearkka dihte doavttir, sosiálabargis dahje fysioterapevta. Du RAI-árvvoštallamii sáhttet oassálastit maid dutnje dehálaš olbmot, ovdamearkka dihte du guoibmi dahje mánná. Oaččot ieš válljet, geat du lagašolbmuin oassálastet árvvoštallamii.

Goas RAI-árvvoštallan dahkko?

RAI-árvvoštallan dahkko álo go jeavddalaš bálvalus álgá, sullii mánotbaji siste bálvalusa álgimis. Dan maŋŋá RAI-árvvoštallan dahkkojuvvo uhcimustá jahkebeali gaskkaid. Jos du dilli čielgasit rievdá, de árvvoštallan dahkko ođđasit.

Mii RAI-árvvoštallamis dáhpáhuvvá?

RAI-árvvoštallamii gullet ollu gažaldagat. Dat gusket earet eará árggas ceavzima, dálkkasdivššu, muitima sihke biebmodili.

Divššár sáhttá dahkat maid iešguđetlágan teasttaid. Son sáhttá testet ovdamearkka dihte du oainnu dahje dássedeattu. Sáhtát ovttas dikšáriin guorahallat, leatgo dus mihttomearit, mat laktásit iežat árgaeallimii. Mihttomearrin sáhttá leat ovdamearkka dihte dat, ahte máhtát ieš gárvodit dahje válddát ieš borramuša tallerkii.

RAI-árvvoštallan čoaggá dieđu dus. Maid dieđuin dahket?

RAI-árvvoštallamis čogget seammás maid áššehasdieđu. Dan gieđahallet seammaláhkai go earáge áššehasdieđuid. Dieđut sirdásit Dearvvasvuođa ja buresveadjima lágádussii jeavddalaččat guktii jagis. Dán dieđu vuođul ii sáhte identifiseret du dahje geange eará olbmo. Dieđu geavahit divššu ja bálvalusaid ovddideapmái.

RAI-árvvoštallamii guoski áššiin sáhtát leat oktavuođas RAI-koordináhtor, dikšunbarggu hoavda Päivi Kontioi (paivi.kontio@utsjoki.fi, 040 181 0280) dahje ruoktobálvalusa bargiide.


Eará ođđasat