Sámegielaid gáiddusoahpahusfidnu oaččui joatkkaruhtadeami – Fitnus illudit ja vurdet joatkkaáiggi buktit bissovaš čovdosiid
3.6.2021
Ohcejoga gieldda ja Sámedikki oktasaš sámegielaid gáiddusoahpahusa pilohttafidnu lea ožžon joatkkaruhtadeami. Oahpahus- ja kulturministeriija lea juolludan fidnui ruhtadeami jagi 2023 rádjái. Sámegielaid gáiddusoahpahusfidnu álggii jagi 2018 ja dálá ruhtadeapmi lea juolluduvvon jagi 2021 lohppii.
Prošeaktahoavda Hanna Helander illuda joatkkaruhtadeamis. Dat doarju fitnu ulbmila stáđásmahttit sámegielaid gáiddusoahpahusa Suomas.
– Sullii 70 proseantta vuođđoskuvlaahkásaš sámemánáin ásset ja vázzet skuvlla sámiid ruovttuguovllu gielddaid olggobealde. Lea hui dehálaš, ahte maiddái sii ožžot vejolašvuođa oahppat iežaset soga giela. Sámegielaid oahpahusa stáđásmahttin sámeguovllu olggobealde lea guovddáš ovdáneapmi dáid sámemánáid ja -nuoraid giela ja kultuvrra ovdii, Helander deattuha.
Maiddái ovddidanbargojoavku evttoha oahpahusa stáđásmahttima
Oahpahus- ja kulturministeriija ásahii jagi 2020 sámegielaid ja sámegielat oahpahusa ovddidanbargojoavkku, man raporta gárvánii dán jagi cuoŋománus. Maiddái bargojoavku evttoha sámeoahpahusa stáđásmahttima sámiid ruovttuguovllu olggobealde.
Sámegielaid oahpahus gáiddusin lea leamašan buorre čoavddus daidda skuvllaide, main lagašoahpahusa ordnen ii leat vejolaš, muitala Sámedikki skuvlen- ja oahppomateriálalávdegotti sátnejođiheaddji Tauno Ljetoff.
– Sámegielat leat nu áitatvuložat, ahte daid oahpahusa galggalii stáđásmahttit nu johtilit go vejolaš. Dán muttus lea buorre, ahte fidnodoaibma joatkašuvvá, muhto mii vuordit sakka bissovaš čovdosiid, Ljetoff muitala.
Sámegielaid gáiddusoahpahusfidnu ordne Suomas hubmojuvvon golmma sámegiela, anáraš-, nuortalaš- ja davvisámegiela, oahpahusa sámiid ruovttuguovllu (Ohcejoga, Anára, Eanodaga ja Soađegili davveoasi) olggobealde.
Fitnu oahppiidlohku lea lassánan juohke jagi. Dál fitnu bokte sámegiela oahpahusa gazzet miehtá Suoma 92 oahppi, sis 44 davvisámegiela, 27 anárašgiela ja 20 nuortalašgiela. Fitnus leat mielde 35 oahpahusa ordnejeaddji ja 59 skuvlla.
Lassedieđut:
Hanna Helander
Prošeaktahoavda
tel. 040 7012 094
Arla Magga
Prošeaktakoordináhtor
tel. 040 198 5033