Sámegielaid gáiddusoahppiid mearri stuorru – Anni-Sofia Niittyvuopio bargagođii fidnokoordináhtorin

Sámegielaid gáiddusoahpahusprošeavtta ođđa skuvlajahki vulggii johtui Oulus borgemánu 5.-6. beivviid ordnejuvvon skuvlenbeivviiguin. Govas gurut ravddas Anni-Sofia Niittyvuopio, Henna Aikio, Hanna Helander, Satu Pieski, Ulla Aikio-Puoskari ja Joni Saijets.

Ohcejoga gieldda ja Sámedikki oktasaš sámegielaid gáiddusoahpahusa pilohttafitnu oahppiidmearri stuorru ain.

Sámegielaid gáiddusoahpahusa pilohta njealját lohkanjahki álgá vuossárgga 16.8. Lohkanjagi 2021–2022 fitnus leat oktiibuot 104 oahppi 30 gielddas iešguđet guovlluin Suomas. Anárašgiela oahppit leat oktiibuot 34, nuortalašgiela 19 ja davvisámegiela 52. Fitnu koordináhtorin lea bargagoahtán Anni-Sofia Niittyvuopio Sámedikkis. Son fuolaha oktavuođain skuvllaide.

Fitnu oahpaheaddjin barget boahttevaš lohkanjagi Sirkka Sanila (nuortalašgiella), Henna Aikio (anárašgiella), Joni Saijets (davvisámegiella eatnigiellan) ja Satu Pieski (davvisámegiella nubbin giellan). Pieski sirdása čakčamánu álggus lassin njealji mánotbadjái prošeaktahoavdan dan boddii, go Hanna Helander lea virgefriijas.

Sirkka Sanila oahpaha sámegiela gáiddusin Stockholmmas, Henna Aikio ja Satu Pieski Oulus ja Joni Saijets johtti sápmelaš eallinvuogi mielde jogo ruovttus dahje doppe, gosa lea jođedettiinis bisánan.

– Dán fitnus lea šaddan buorre ja vuogas bargosearvvuš beroškeahttá das, ahte mii orrut guhkkin eret nuppiideamet, dadjet oahpaheaddjit.

Oahpahus ordnejuvvo Teams-vuogádagas, gos oahpaheaddjiin lea maid vejolašvuohta juogadit sihke fuolaideaset ja máhtuset iežaset virtuála “oahpaheailanjas”. Oahpaheaddjit vurdet juo deaivat oahppiid.

– Oahppiid motivašuvdna ja mokta leat vuohttimis maiddái šearpma bokte. Lea duođai fiinnis oaidnit man láhkai oahppit skuvllain miehtá Suoma ovttasbarget iežaset gáiddusjoavkkuin ja leat čatnasan giela oahppamii, muitala anárašgiela oahpaheaddji Henna Aikio.

Gáiddusoahpahusfitnu oahpaheaddjiid ja prošeaktabargiid ođđa lohkanjahki álggii oktasaš plánenbeivviiguin Oulus borgemánu álggus. Fitnus lea barggu vuolde ovttasbarggus Lappi universitehta ADVOST-prošeavttain gáiddusoahpahusa giehtagirji. Dasa lassin fidnu lea válmmaštallamin ovttas Deanuleagis sámástit -prošeavttain oahpahusfilmmaid guollebivddus, ja fidne das maid gielalaš rávvema sihke mánáid fuolaheaddjiide ja virgeolbmuide.

Lassedieđut:

Hanna Helander

Prošeaktahoavda

hanna.helander@edu.utsjoki.fi

Anni-Sofia Niittyvuopio

Prošeaktakoordináhtor

anni-sofia.niittyvuopio@samediggi.fi

Satu Pieski

satu.pieski@edu.utsjoki.fi