Váldostivra čoahkkana vuossárgga 23.10. mearridit gielddahoavdda virggi deavdimis – čuovo čoahkkima njuolggosáttan dmu 14 rájes!
18.10.2023
Ohcejoga váldostivra. Govva: Studio Borga
Ohcejoga váldostivra čoahkkana vuossárgga 23. beaivve golggotmánu.
Váldostivra mearrida gielddahoavdda virggi deavdimis. Gielddaráđđehus evttoha váldostivrii, ahte virgái eai jearahallo ohccit ja gielddahoavdan válljejuvvo hálddahusdiehtagiid magisttar, gieldda dálá buresveadjinhoavda Päivi Kontio. Kontio lea addán virgái iežas miehtama.
Gielddaráđđehus mearridii evttohit váldostivrii Kontio virgái njuolga, jearahallama haga jienaiguin 4–3. Vd. gielddahoavda Tanja Lepistö guđii mearrádusas sierraoaivila, daningo su mielas buorre hálddahussii livčče gullan jearahallat virgái buot formála gelbbolašvuođa deavdán ohcciid. Gielddahoavdda virgái leat evttohassan buohkanassii 33 olbmo. Virggi jotkojuvvon ohcanáigi nogai 29. beaivve čakčamánu.
Váldostivra mearrida maiddái earret eará boahtte jagi boahto- ja giddodatvearroproseanttain, gieldda searvamis Davvi- ja Nuorta-Lappi oktasaš barggolašvuođaguovllu vuođđudeapmái ja erenomášluohkáoahpaheaddji virggi vuođđudeamis.
ČUOVO ČOAHKKIMA NJUOLGGOSÁTTAN
Váldostivrra čoahkkimat leat buohkaide rabas. Čoahkkima leage vejolaš čuovvut njuolggosáttan Ohcejoga gieldda Youtube-kanálas vuossárgga 23.10. sullii dmu 14 rájes. Čoahkkinbáddi lea oaidnimis kanálas maiddái njuolggosáddaga maŋŋá. Gielddadálus čoahkkima sáhttá čuovvut feaskkirlanja šearpmas.
Čoahkkimis lea simultánatulkon sámegielas suomagillii. Maiddái tulkojuvvon báddi almmustahtto Youtube-kanálas editerema maŋŋá.
OAHPÁSMUVA EVTTOHUSLISTUI
Sáhtát oahpásmuvvat čoahkkima olles evttohuslistui dákko. Čoahkkinbeavdegirji almmustahtto dárkkisteami maŋŋá neahttasiiddusteamet.