Váldostivra mearridii máhcahit gielddahoavdda virggi deavdima ruovttoluotta gielddaráđđehussii
23.10.2023
Ohcejoga váldostivra mearridii čoahkkimisttis vuossárgga 23. beaivve golggotmánu máhcahit gielddahoavdda virggi deavdima ruovttoluotta gielddaráđđehusa válmmaštallamii.
Gielddaráđđehus lei evttohan váldostivrii, ahte virgái eai jearahallojuvvo ohccit ja gielddahoavdan válljejuvvo hálddahusdiehtagiid magisttar, gieldda dálá buresveadjinhoavda Päivi Kontio. Kontio lei addán virgái iežas miehtama. Gielddaráđđehus mearridii evttohit váldostivrii Kontio virgái njuolga, jearahallama haga jienaiguin 4–3. Vd. gielddahoavda Tanja Lepistö guđii mearrádusas sierraoaivila, daningo su mielas buorre hálddahussii gulašii jearahallat virgái buot formála gelbbolašvuođa deavdán ohcciid.
Váldostivrra áirras, gielddaráđđehusa ságadoalli Väinö Guttorm (kd.) evttohii vuossárgga čoahkkimis, ahte ášši máhcahuvvo gielddaráđđehussii ođđasit válmmaštallamii, go váldojuvvo vuhtii maid váldostivra lea čoahkkimisttis 21.6.2023 (§ 30) mearridan gielddahoavdda virggi ohcciid jearahallamis. Guttorm buvttii sáhkavuorustis ovdan, ahte dákkár meannudeapmi maid vástida buorre hálddahusa doaibmavuogi. Guttorm evttohus vuittii gielddaráđđehusa vuođđoevttohusa jienaiguin 11–4.
Ohcejoga gielddahoavdda virgái leat evttohassan 32 ohcci ja okta miehtama addán olmmoš. Virggi jotkojuvvon ohcanáigi nogai 29. beaivve čakčamánu.
Gielddahoavdda virgi bođii ohcanláhkai, go gielddahoavdan doaibman Taina Pieski sirdásii borgemánus Sámemusea Siidda museahoavdan.