Váldostivra nannii jagi 2023 boahto- ja giddodatvearroproseanttaid ja mearridii searvat Pohjois-Lapin Ruoka Oy -fitnodatsearvái

Ohcejoga gieldda váldostivra čoahkkanii duorastaga 27.10. Váldostivra gieđahalai earret eará jagi 2023 boahto- ja giddodatvearroproseanttaid ja sode- ja čuvgehusdoaimma biebmobálvalusaid lágideami 1.1.2023 rájes. Čoahkkimis ságastalle maiddái sámelogahaga jagi 2021 stáhtadoarjaga ohcanáššis.

jagi 2023 boahto- ja giddodatvearroproseanttat

Váldostivra nannii Ohcejoga jagi 2023 boahtovearrun 8,36 proseantta.

Sode-bálvalusaid ja gádjundoaimma ordnema ovddasvástádus ja goasttádusat sirdojuvvojit boahtte jagi gielddain buresveadjinguovlluide. Doaimma ruhtadeapmin oassi gielddaid vearroruhtadeami boađuin sirdojuvvo stáhtii ja mearkkašahtti oassi sirdimis dahkkojuvvo gielddavearu bokte. Dan dihtii buot Nannán-Suoma gielddaid boahtovearroproseanttat vuoliduvvojit 12,64 proseantaovttadaga. Ohcejoga jagi 2022 vearroproseanta lea 21, man vuođul váldostivra nannii jagi 2023 boahtovearroproseantan 8,36.

Lassin váldostivra mearridii jagi 2023 giddodatvearroproseanttaid ná:

• Oppalaš giddodatvearroproseanta 1,25
• Fásta ássanviesuid vearroproseanta 0,65
• Eará ássanviesuid vearroproseanta 1,60
• Huksekeahtes huksensaji vearroproseanta 2,00

Giddodatvearroproseanttat bissot ná seammán go jagi 2022.

searvan POHJOIS-LAPIN RUOKA OY -fitnodatsearvái

Váldostivra mearridii, ahte Ohcejoga gielda searvá Soađegili gieldda vuođđudan Pohjois-Lapin Ruoka Oy -fitnodatsearvái sode- ja čuvgehusdoaimma biebmobálvalusaid lágideamis.

Lappi buresveadjinguovlu álggaha doaimmas 1.1.2023. Háhkanlága mielde ovdamearkka dihte gieldda guovddášgievkkan ii sáhte buvttadit biebmofuolahusa bálvalusaid sihke gieldda ja buresveadjinguovllu bálvalusovttadagaide, muhto doaimma ferte baicce rievdadit fitnodatsearvin.

Sámelogahaga stáhtadoarjjaáššis čielggadus

Čoahkkima loahpas váldostivrras ságastalle Ohcejoga sámelogahaga stáhtadoarjjaáššis. Gielddahoavda Taina Pieski ja čuvgehushoavda Virpi Veskoniemi čilgiiga váldostivrii, manin sámelogahaga guorahallanvuloš stáhtadoarjja bázii ozakeahttá čakčat 2020 jahkái 2021.

Pieski ja Veskoniemi muitaleigga váldostivrii, ahte ášši fuomášedje borgemánus 2022 gieldda boahttevaš jagiid deaddorehkegiid (su. painelaskelma) válmmaštallama oktavuođas. Ášši čielggadišgohte dalán ja čielggadanbargu lea joatkašuvvan gitta dán beaivái. Dáhpáhusas addojuvvo čuvgehuslávdegoddái virggálaš čielggadus, man gielda almmustahttá maiddái neahttasiiddustis buohkaide oaidninláhkai. Lassin gielddas leat álggahan doaimmaid, maiguin sihkkarastet, ahte seammaláhkai ii geava boahtteáiggis.

čoahkkinbeavdegirji lohkanláhkai

Váldostivrra čoahkkima olles beavdegirjji sáhttá lohkat neahttasiiddusteamet (suomagillii). Sámegiel beavdegirji almmustahtto jorgalusa gárváneami maŋŋá.

čoahkkin geahččanláhkai

Váldostivrra čoahkkimat streamejuvvojit ja daid sáhttá geahččat sihke njuolggosáttan ja maŋŋelgihtii báddin Ohcejoga gieldda Youtube-kanálas. Sihke álgoálgosaš ja tulkojuvvon čoahkkinbáttit almmustahttojit kanálas editerema maŋŋá.