“Buoremus, mii Ohcejogas lea!” - Davi gievrramus -gilvu movttiidahttá hárjehallat
14.6.2024
Gáregasnjárgalaš Jouni Järvelin vuittii mannan geasi Davi gievrramus tihttela vuollel 95-kilosaččaid gilvoluohkás. Järvelin bargá fitnodatdoallin Giellajohka-turismafitnodagas Anára ja Gáregasnjárgga gielddaid ráji lahkosis. – Davi gievrramus -gilvu lea erenomáš fiinna dáhpáhus, gos juohkehaš beassá iskat fámuidis ja fárttas, muitala Jouni Järvelin. – Gilvui sáhttá oassálastit álggahalli gievrrastalli dahje dakkár, gean gievrrastallama bálggis lea juo guhkit.
– Hárjehallagohten vihtta jagi dassá Gáregasnjárggas Martin jumppas (Martti lášmmohallamis), muitala Järvelin. – Fitnen álggus moddii vahkus áiggeádjejoavkkus, man jođihii Martti Kyrö. Vehá vehážiid mu hárjehallangearddit lassánedje 3-4 geardin vahkus. Lassin bargoskihpáriiguin mii hárjehallat ovttas.
Gilvvohallama bokte lean meroštallan hárjehallamii ulbmiliid, dasgo gilvvuin birgen buktá movtta. – Mun vuiten diibmá gilvvu. Dat bálkkašii guhkes hárjehallanáigodaga rahčamušaid. Gilvvus lea fiinna vuoigŋa, gos guossit movttiidahttet buot oassálastiid.
Gilvošlájat lea lossadat ja dat gáibidit gilvvohallis buriid álššaid ja sávrivuođa. Vuosttasin jorahit tráktorjuvlla, nubbin farmavázzin. Das vázzit deattut gieđas. Goalmmát šládjan lea áksildeaddolokten. Das deaddostákku lovttohallat oktan deattuin 90 sekundda nu gallii, go vejolaš. Lovttohallamis gieđat galget njuolgat. Njealját šlájas lovttohallat seahka olggiid ala, ja vuohten lovttohallamiid mearri dihto áiggis rátká gilvvu. Maŋimus šládjan geassit biilla 20 mehtera.
Gilvvus leat gilvoluohkát sihke nissoniidda ja albmáide: nissoniid luohkát leat vuollel 65 kg ja rabas luohkká, albmáid fas vuollel 95 kg ja rabas luohkká. Persovnnalaš gilvvu lassin sáhttá gilvvohallat joavkun. Njealji olbmo joavkku oassálastit sáhttet gullat iešguđet gilvoluohkkái. Gilvoluohká golbma gievrramusa ožžot ruhtabálkkašumi. Buot oassálastit ožžot Davi gievrramus -buvttabálkkašumi.
– Diibmá gease juohke gilvoluohkás galggai rahčat albma láhkai, vai vuittii ruhtabálkkašumi, muitala Jouni Järvelin. – Buot buohkanassii oassálastit ledje sullii njealljelogis. Davi gievrramus -gilvu lea áidna gilvu, masa lean oassálastán. Sáhtášin oassálastit earáge gilvvuide, jos dat ordnejuvvoše Lappi guovllus. Gilvvohallan movttiidahttá hárjehallat, muhto givrodaga hárjehallan lea leamašan ávkin maid árgaeallimis. Veaján ollu buorebut bargat fysalaš bargguid ja vaikkeba čuollat mohtorgielká skálvvis.
Davi gievrramus -gilvu ordnejuvvo lávvardaga 29.6.2024 Ohcejoga valáštallangiettis. Gilvu lea dárkkuhuvvon gievra albmáide ja nissoniidda, sidjiide, geat asttuáiggis gievrrastallet ja ámmátolbmuide. Gilvvu duopmár lea Martti Kyrö, guhte lea guhká gievrrastallan asttuáigge. Gilvvu ordnejit Ohcejoga gielda, Ohcejoga gievrrat ja Utsjoen Kuohu -searvvit.
Loga eanet: https://utsjoki.fi/pohjoisenvahvin