Ohcejoga gilieahkediin árvaledje dálkkasin váigadis dillái lagašbiepmu, kulturguovddáža ja luonddusjohtima – Deavdde jearahallanskovi ja muital iežat ovddidanjurdaga!

Njuorggána gilieahkedis gaskavahku ságastalle earret eará gillái guhká plánejuvvon geahppa johtolaga geainnus ja mátkkošteaddjiid bisánanbáikkiin. Govva: Sonja Sistonen / Ohcejohka

Ohcejoga gieldda dán vahku gilieahkediin šadde buorit ságastallamat ja dievva konkrehta ovddidanevttohusat Ohcejoga giliide miehtá gieldda.

Ohcejoga gielda lea ohcan Fáhkka ráhkadusnuppástusa (ÄRM) gieldan koronapandemiija ja Deanu luosa guolástangildosa dagahan vuorddekeahtes hástalusaid dihte. Koronaráddjehusat, rájáid giddemat ja Deanu luosa ráfáidahttin čuhcet mearkkašahtti láhkai earret eará báikkálaččaid buresveadjimii, sosiála gaskavuođaide, sámekultuvrii, ealáhusaide ja rádjagávpái.

Dán hástaleaddji dilis Ohcejoga gielda čielggada ja pláne doaimmaid, maiguin livčče vejolaš seailluhit Ohcejoga gieldda eallinfámu. Dáid doaimmain gielda hálidii gullat jurdagiin nu viidát go vejolaš njuolga ohcejohkalaččain – ja bovdiige gieldda buot ássiid ja fitnodagaid gilieahkediidda.

Ođđa johtolagat, lagašbiepmuin ávkkástallan ja Ohcejoga iežas kulturguovddáš

Ohcejoga gilieahkedat álge vuossárgga Gáregasnjárggas, joatkašuvve maŋŋebárgga Ohcejogas ja nohke gaskavahku Njuorggánii.

Golmma gilieahkedii čoahkkanedje buohkanassii sullii 75 gieldalačča sihke gullat Fáhkka ráhkadusnuppástusa barggus ja suokkardallat, makkár ođđa bálvalusaiguin ja doaibmabijuiguin Ohcejoga eallinfámu ja báikkálaččaid buresveadjima sáhtášii dán dilis buoridit.

Ságastallamat ledje ávkkálaččat. Báikkálaččat evttohedje Ohcejoga gildii earret eará ođđa geahppa johtolaga geainnuid ja luonddubálgáid, kulturguovddáža, musea, fitnodatdálu, lagašbiepmu gieđahallanlágádusa, bázahusaide máŋggabealagot sirrenlihtiid ja ođđa vejolašvuođaid luonddus johtimii, earret eará meahccesihkkelastimii, dálvevuojadeapmái, mealluntuvrraide ja lottiid geahčadeapmái.

Ságastallamiin loktanedje ovdan maiddái earret eará sámekultuvrra seailun ja psykososiála doarjja, man olbmot dárbbašit váigadis dilis.

Gieldda ovddasteaddjit hui duđavaččat gilieahkediidda

Gilieahkediidda oassálaste Ohcejoga gieldda beales gielddahoavda Vuokko Tieva-Niittyvuopio, vs. ovddidan- ja ealáhushoavda Johanna Mikkola ja Vásttolaš turisma Ohcejogas -prošeavtta hoavda Sonja Sistonen.

Gielddahoavda Vuokko Tieva-Niittyvuopio lea hui duđavaš gilieahkediid bohtosiidda.

– Gililaččat ledje aktiivvalaččat ja adde midjiide buorre nisttiid joatkkabargui. Buot giliid iežaset luondu badjánii bures oidnosii ja dás lea buorre dál joatkit bargguin, Tieva-Niittyvuopio muitala.

Fáhkka ráhkadusnuppástusa doaimmaiguin lea ulbmil eastit guovllu ekonomiija maŋosmannama, nanosmahttit gieldda geasuhan- ja doallanfámu ja buoridit gieldalaččaid buresveadjima.

Ovddidan- ja ealáhushoavda Johanna Mikkola mielas gilieahkediin ovdanbukton evttohusat dievasmahttet bures ÄRM-bargojoavkkuin ja gieldda árat ovddidanprošeavttain badjánan dárbbuid.

– Dáid evttohusain mii ovddidišgoahtit dál daid, main leat buoremus vejolašvuođat ovdánit ÄRM-barggus, fidnet ruhtadeami ja ná ollašuvvat, Mikkola muitala.

Gilieahkediin ja ÄRM-bargojoavkkuin hábmejuvvon prošeaktajurdagiid ovddideamis lea oalle hoahppu, daningo ÄRM-oppalašplána galgá máhcahit bargo- ja ealáhusministeriijai jo ovdal mihcamáraid.

Muital iežat ovddidanjurdaga!

Ohcejoga gielda čoaggá sihke gieldalaččain ja fitnodagain evttohusaid Ohcejoga gieldda ovddideapmin Fáhkka ráhkadusnuppástusa dilis 31.5. rádjai.

Jos it beassan gilieahkediidda dahje du mielas leat lasi ovddidanjurdagat, sáhtát deavdit digitála jearahallanskovi dákko!