Ohcejohka gáibida stáhtas jođánit doarjjapakeahta Deanu luossabivdogildosa geažil
7.4.2022
Ohcejoga gielda doarjala sihke eana- ja meahccedoalloministeriijai ja stáhtaráđđái, vai Suoma davimus gieldda eallinfámu sáhtášii dorvvastit hástaleaddji dilis.
Ráđđehusa láhkahápmosa mielde luossabivdu livččii gildojuvvon Deanu čázádagas maiddái boahtte gease. Suoma ja Norgga ovddit evttohusa mielde Deanus livččii ožžon bivdit luosa boahtte gease ráddjejuvvon áiggi árbevirolaš bivdosiiguin.
Ohcejoga gielda gávnnaha varas cealkámušastis, ahte Deanu luossanáliid ealáskahttima várás dárbbašuvvojit farggamusat vuostevurolaš luossabivdogielddus ja ráddjehusat maiddái Norgga stáhta guovllus ja mearraguovllus. Gielda atná dehálažžan luossanáliid suodjaleami ja realisttalaš luossabivdoráddjehusaid, muhto fuopmášahttá, ahte ráddjehusat dušše johkaguovllus leat vuoimmeheamet, jos luossabivdui ii váikkuhuvvo mearraguovllus. Luossanáliid dili galggašiige geahččalit buoridit vuosttas sajis luossaveajehiid borri bátneguliid bivdduin, dálkkádatnuppástusa váikkuhusaid caggamiin sihke luosa ja dan sálašealániid mearrabivdui váikkuhemiin.
Lassin Ohcejoga gielda muittuha, ovddit cealkámuššii čujuhemiin, rabas válmmaštallama ja báikkálaš servoša duođalaš gullama dehálašvuođas, go Deanu luossabivdoráddjehusat guorahallojit. Gielda fuopmášahttá cealkámušastis maid, ahte láhkaevttohusas buktojuvvojit dušše detáljalaččat ovdan luossabivdogildosa ekonomalaš, sosiálalaš ja kultuvrralaš váikkuhusat Suoma áidna sámeeanetlogu gieldda veahkadahkii.
– Jagi 2021 Deanu luossabivddu dievasgildosis leat čuvvon Ohcejoga guovloekonomiijai sullii viđa miljovnna euro manahusat. Boahtte gease luossabivddu dievasgildosa oppalašekonomalaš váikkuhusat leat seamma dásis, vihtta miljovnna euro, Ohcejoga gielda gávnnaha cealkámušastis.
– Dilli lea smávva gieldda ássiid ja gieldda ekonomiija dáfus birgetmeahttun. Stáhtaváldi lea dorjon gieldda ekonomalaš manahusaid dán rádjai 300 000 euro AKKE – fáhkkes ráhkadusnuppástusa doarjjaruhtademiin. Doarjja lea goit ekonomalaš manahusaid ektui áibbas menddo uhcci, dadjá gielddahoavda Taina Pieski.
Luossabivdogielddus, koronaepidemiija ja goluid loktaneapmi gáibidit dál stáhta doarjjadoaimmaid
Ohcejoga gieldda maŋimuš jagiin deaividan ekonomalaš, sosiálalaš ja kultuvrralaš hástalusaid geažil gielda lahkona iežas reivviinis maiddái stáhtaráđi, vai dat álggaha jođánit doarjjapakeahta válmmaštallama Ohcejohkii sihke nammada dan fáhkkes ráhkadusnuppástusa gieldan. Gielda lea sádden reivve guovddáš ministariidda.
Ohcejohka gárttai fáhkkes ráhkadusnuppástusa dillái giđđat 2021. Váldosivvan dasa lei Deanu luossabivdogielddus. Dasa lassin sihke koronaepidemiija ja energiija hattiid loktaneapmi leat sakka čuohcan guhkes gaskkaid rádjagildii eahpedábálaš stuorra čuovvumušaiguin.
– Ohcejoga turisma ja gieldda olbmuid lasseboađut leat jahkelogiid áigge vuođđuduvvan Deanu luossabivdui. Deatnu lea leamaš min geađgejuolgi. Ekonomalaš manahusaid lassin luossabivdogildosis lea leamaš mearkkašahtti váikkuhus báikegotti olbmuid buorredillái ja dearvvasvuhtii, gielda gávnnaha reivvestis.
– Lassin korona jaskkodahtii nu nannosit ovdáneaddji turismma go Suoma ja Norgga gaskasaš beaivválaš johtolaga. Rádjagiddemat bissehedje measta guovtti jahkái Ohcejoga rádjagávppiid doaimma ja váttásmahte barggus johtima Norggas. Ohcejoga fitnodagaid gávpejođus badjel 75 proseantta vuođđuduvvá rádjagávpái ja gávppiid áššehasain 90 proseantta leat norgalaččat.
– Ovddibuid lassin Ohcejoga guovloekonomiija ja gieldda olbmuid birgenlági ja buorredili guhkes gaskkaid guovllus hástalit dál maiddái jagi áigge boaldámušaid ja elrávnnji sakka loktanan haddi, gielda čielggada reivves iežas váttis dili.
Ohcejohka evttoha stáhtaráđđái geahppa johtolaga infra doarjuma
Ohcejoga gielda doarjalage stáhtaráđđái, vai dat álggaha jođánis doarjjadoaimmaid válmmaštallama buhttema dihte daid mearkkašahtti ekonomalaš manahusaid, maid luossabivdogielddus Ohcejohkii dagaha.
Konkrehtalaš vuohki doarjut guovllus ceavzima livččii doarjut geahppa johtolaga infra huksema giliguovddážiin.
– Ohcejoga dehálamos ovddidanášši lea Suoma čábbasamos geaidnun jienastuvvon Deanugeainnu, guovlogeaidnu 970 buorideapmi. Geainnu ja geahppa johtolaga ovddidandoaimmat buoridivčče johtolatdorvvolašvuođa, dorjjošedje turismma ovdáneami ja lasihivčče vázzima ja sihkkelastima, muitala gielddahoavda Pieski.
Lassediehtu:
Taina Pieski
Gielddahoavda
Ohcejoga gielda
+358 50 535 1574
taina.pieski@utsjoki.fi