Suoma sisrájáid gohcet gitta 16.1.2022 rádjai – spiehkastagat earret eará rádjeservošiid ássiide
4.1.2022
Suoma sisrájáid gohcet 28.12.2021–16.1.2022
Sisrádjegohccin máhcahuvvo ollislaččat Suoma ja buot Schengen-riikkaid rádjejohtolahkii. Dasa lassin riikii boahtima ráddjehusat ja dearvvasvuođasihkkarvuođadoaimmat leat čavgejuvvon nu ahte buohkain Supmii olgoriikkas boahttiin gáibiduvvo duođaštus dievaslaš boahkuhanráiddus dahje vuollel guhtta mánotbaji dassái buhccojuvvon koronadávddas sihke dáid lassin duođaštus vuollel 48 diimmu boares negatiiva covid19-teastabohtosis. Gáibádus guoská 1.1.2022 rájes sin geat leat riegádan jagi 2006 dahje dan ovdal.
Ovddabealde máinnašuvvon eavttuin sáhttet spiehkkasit earret eará Suoma ja Norgga rádjeservošiid ássit ja sii sáhttet boahtit Supmii jus sis lea mielde duođaštus dohkkehuvvon covid19-boahkuhanráiddus, EU digitála koronaduođaštus vuollel guhtta mánotbaji dassái buhccojuvvon covid19-dávddas dahje duođaštus covid19-teastta negatiiva bohtosis, mii lea dahkkon eanemustá 7 jándora ovdal Supmii boahtima.
Negatiiva teastaboađus ii eaktuduvvo Suoma riikavuložiin
Negatiiva koronateastaboađus ii eaktuduvvo Suoma riikavuložiin, Suomas fásta ássi olgoriikkalaččain iige olbmuin, geaid riikii boahtima ággan lea vealtameahttun sivva dego bákkolaš bearašáššit dahje eará bákkolaš persovnnalaš sivat. Buot mátkkošteaddjiide gusket goittotge njoammudávdalága vullosaš gáibádusat duođaštusaid čájeheamis.
Sisrádjegohcima mearrádusa birra sáhttá lohkat lasi stáhtaráđi neahttasiidduin.
Lassedieđut:
Dieđuid Supmii boahtimis koronapandemiija áigge gávnnat rádjegozáhuslágádusa neahttasiidduin. Rádjegozáhuslágádus rávve riikavuložiid rádjerasttildanáššiin maiddái telefovnna ja šleađgapoastta bokte. Bálvalusa oažžu suoma-, ruoŧa-, ja eaŋgalasgillii árgabeivviid dmu 8-16 nummiris 0295 420 100. Gažaldagaid sáhttá sáddet šleađgapoasttain čujuhussii rajavartiolaitos@raja.fi.
Beaiváduvvon rávvagiid Norgii boahtimis gávnnat Norgga stáhta neahttasiidduin.
Jus dus leat gažaldagat dohkkehuvvon boahkuid dahje errema ja teastagáibádusaid birra, váldde oktavuođa Stáhtaráđi koronainfo -telefonbálvalusain 0295 535 535 dahje fina THL neahttasiidduin.
Gávnnat lasi dieđu báikkálaš koronavirusdilis koronaturvallinenlappi.fi-siidduin sihke Ohcejoga dili, koronatestemiid ja -boahkuhemiid birra gieldda koronasiidduin.