Badjel 16-jahkásaččaid joavkodoaimmaid oažžu vuot doallat, čoahkkananráddjehus ložžejuvvo badjel 20 heggii – Lappi buohccedikšunbiire máhccá koronavirusepidemiija vuođđodássái

8.4.2021

Lappi buohccedikšunbiirre koronakoordinerenjoavku dieđiha, ahte Davvi-Suoma koronavirusdilli lea ráfon ja dan dihte guovlu máhccá koronavirusepidemiija vuođđodássái. Koronakoordinerenjoavkku dieđáhusa sáhttá lohkat Lappi buohccedikšunbiirre neahttasiiddus.

Koordinerenjoavku oaivvilda, ahte Lappi buohccedikšunbiirres ii leat šat dárbu leat doalakeahttá badjel 16-jahkásaččaid joavkodoaimmaid. Dan dihte maiddái Ohcejoga gieldda ja rávesolbmuidskuvlla joavkoasttuáiggedoaimmat joatkašuvvet dábálaččat vuossárgga 12.4. rájes.

Njukčamánus fápmui boahtán guđa heakka čoahkkananráddjehus rievdá 12.4. rájes badjel 20 heakka čoahkkananráddjehussan. Koordinerenjoavku ávžžuha, ahte olbmot garvet ain maiddái badjel 20 heakka priváhta dilálašvuođaid ja čoahkkanemiid, ahte gáiddusbargu joatkašuvvá ain viidát ja ahte skuvllain sihke bargoveahka ja badjel 6. luohká oahppit geavahit ain ámadadjomáskkaid.

Koordinerenjoavku ávžžuha, ahte buohccedikšunbiirre rájáid rasttildeaddji falástallan- ja lihkadandáhpáhusat eai ordnejuvvo 24.4. rádjai. Ávžžuhus guoská buot ahkásaččaid lihkadan- ja falástallandáhpáhusaid sihke siste ja olgun. Ávžžuhus ii guoskka riikkajoavkkuid doaimmaid iige SM- ja 1-divišuvnna gilvvohallamiid.

Vuoi dilli bisošii buorrin maid dás ovddosguvlui, muittuha koordinerenjoavku dorvvolašvuođadoaimmain, maiguin lea vejolaš eastadit koronavirusnjoammumiid. Joavku muittuha, ahte ain lea dehálaš fuolahit giehta- ja gossanhygienas, doallat guovtti mehter dorvogaskkaid, garvit olmmošjoavkkuid, atnit suodjemáskka ja ohcalit unnage dávdamearkkain koronatestii.

Ohcejoga gieldda áiggedását ávžžuhusaid ja ráddjehusaid oainnát álo dán beaiváduvvi artihkkalis. Gávnnat áigeguovdilis dieđuid báikkálaš koronavirusdilis ja Ohcejoga koronatestemiin ja -boahkohemiin gieldda koronasiiddus.


Muita uutisia