Ohcejoga sámelogahat sirdása gáiddusoahpahussii ja máskaávžžuhus viiddiduvvo Ohcejohnjálmmi vuolleskuvlii – gieldda koronajoavkkus ođđa ávžžuhusat maiddái skuvlalaččaid ja bargiid ruoktotestemii

Ohcejoga sámelogahaga moatti oahppis lea gávnnahuvvon koronavirusnjoammun maŋŋebárgga 18.1.2022. Logahaga oahppiin sullii goalmmádas lea mearriduvvon karantenii. Dán dihtii Ohcejoga gieldda koronajoavku lea mearridan, ahte sámelogahat sirdása gáiddusoahpahussii áigái 20.1.2022–4.2.2022. Oahppiide, geat dárbbašit erenomášdoarjaga, fállojuvvo vejolašvuohta lagašoahpahussii. Koronajoavku ávžžuha, ahte logahatoahppit eai oassálastte gáiddusoahpahusa áigge maiddái astoáiggis joavkodoaimmaide, mat lágiduvvojit siste.

Ohcejohnjálmmi skuvlla máskaávžžuhus viiddiduvvo guoskat buot skuvlla oahppiid 1. luohká rájes. Ohcejohnjálmmi skuvlla bargiide ja badjeskuvlla oahppiide ávžžuhuvvo FFP2-máska. Vuolleskuvlalaččaide ávžžuhuvvo dábálaš kirurga máska. Oahppit ožžot máskkaid skuvllas. Máskaávžžuhus lea fámus 4.2.2022 rádjai. Ohcejohnjálmmi skuvlii eai ávžžut dán áigái olggobeale gallestallamiid.

Ohcejoga gieldda eará skuvllain máskaávžžuhus guoská ain dušše badjel 12-jahkásaččaid, nappo oahppiid 6. luohkás ovddosguvlui.

Nana ruoktoteastaávžžuhus máŋggaid joavkkuide

Lassin ávžžuhuvvo garrasit, ahte vuolábealde máinnašuvvon joavkkut dahket ruoktoteasttaid beaivválaččat boahttevaš golmma vahku áigge, 11.2. rádjai:

• Sámelogahaga ja Ohcejohnjálmmi badjeskuvlla oahppit
• Sámelogahaga ja Ohcejohnjálmmi skuvlla bargoveahka
• Girjeráju bargit
• Vuodjanbearráigeahčči
• Nuoraidbargi

Lassin ávžžuhuvvo, ahte čuovvovaš joavkkut dahket ruoktoteasttaid guktii vahkus (vuossár- ja gaskavahkkoiđidiid) 11.2. rádjai:

• Gáregasnjárgga badjeskuvlalaččat
• Gáregasnjárgga ja Njuorggána skuvllaid bargoveahka
• Gieldda eará bargit

Oahppit ožžot teasttaid skuvllain. Gieldda bargit sáhttet jearrat teasttaid iežaset lagašhoavddain.

Eará ávžžuhusat joatkašuvvet

Koronajoavku joatká Ohcejoga gielddas fámus leamašan gáiddusbargoávžžuhusa ja viiddes máskaávžžuhusa 22.2.2022 rádjai.

Lappi guovlohálddahusdoaimmahat gieldá ain buot badjel 20 olbmo álbmotdilálašvuođaid ja almmolaš čoahkkimiid, mat lágiduvvojit siste, 22.2.2022 rádjai.  Ohcejoga gielda ávžžuha, ahte olbmot čuvvot čoahkkananráddjehusa maid priváhtadilálašvuođain ja garvet lagaškontávttaid.

Oainnát buot Ohcejoga gieldda dálá rávvagiid, ávžžuhusaid ja ráddjehusaid ovtta sajis dáppe.

Dilli lea Ohcejogas ain ráfálaš

Ohcejoga gieldda koronadilli lea ain ráfálaš, vaikko njoammumat bohtetge ovdan dássidit. Ohcejogas leat maŋimuš guovtte vahku áigge gávnnahuvvon buohkanassii 15 koronanjoammuma. Otne gaskavahku 19.1. sirrejuvvon leat guhtta olbmo. Vuossárgga bohte ovdan okta ja maŋŋebárgga guokte ođđa njoammuma. Eanaš oassi njoammumiin leat gávnnahuvvon olbmuin, geat leat jo leamašan karantenas.

Sihke testen ja njoammunbálgáid guorran doibmet Ohcejogas bures. Otne gaskavahku 19.1. leat testen viidát sihke sámelogahaga oahppiid ja Ohcejohnjálmmi skuvlla bargiid, ja teasttain eai leat gávnnahuvvon ođđa njoammumat.

Mana herkket testii

Jos dus leat makkárnu koronavirusinfekšuvdnii gullevaš dávdamearkkat, báze eaktodáhtolaš karantenii ja fina koronavirusteasttas, tel. 040 682 2348.

Maiddái ruoktoteasttaid gánneha dahkat. Jos ruoktoteasta rievdá positiivan, leage oktavuođas dearvvasvuođaguovddážii, tel. 040 682 2348. Jos don leat garrasit buozus ja ruoktoteasta čájeha negatiivva, fina maiddái dearvvasvuođafuolahusa teasttas.

Eambbo dieđuid Ohcejoga koronadilis, testemis ja boahkuhemiin gávnnat gieldda koronasiiddus.

19.1.2022

Ohcejoga gieldda koronajoavku

Njoammudávddain vástideaddji doavttir Heidi Eriksen

Lassedieđut:

Heidi Eriksen, njoammudávddain vástideaddji doavttir

040 181 0284

heidi.eriksen@utsjoki.fi

Elle Aikio, dearvvasvuođadikšu

040 682 2348

elle.aikio@utsjoki.fi

Pasi Oikarinen, vs. čuvgehushoavda/Ohcejohnjálmmi skuvlla ja sámelogahaga rektor

040 525 8049

pasi.oikarinen@edu.utsjoki.fi