Ohcejogas lea gávdnon bearjadaga okta ođđa koronavirusnjoammun – dán vahkus ovdanboahtán buot golbma njoammuma laktásit seamma njoammunbálgái

Ohcejogas lea gávnnahuvvon bearjadaga 4.12. okta ođđa koronavirusnjoammun.

Maiddái guokte positiiva koronavirusčájánasa, mat dahkkojuvvojedje Ohcejogas duorastaga 3.12. jođánis antigenateasttaiguin, leat dál sihkkaraston positiivan. Nubbi dáid njoammumiin lea olgobáikegotti olbmos.

Dán vahkus ovdanboahtán buot golbma njoammuma laktásit Ohcejoga mannan vahku dáhpáhussii. Olbmot leamašan karantenas ja sii eai leat njoammudan virusa ovddosguvlui. Dál sii leat erremis.

Lassidieđut:

Heidi Eriksen

Vástideaddji doavttir

Tel. 040 181 0284

 

Vuokko Tieva-Niittyvuopio

Gielddahoavda

Tel. 0400 933 754

 

Jos eahpidat alddát dahje lagašbirrasisttát koronavirusnjoammuma, váldde oktavuođa Ohcejoga dearvvasvuođaguovddážii (árgan diibmu 8–16 tel 040 181 0285, vahkuloahpaid, eahkediid ja árgabasiid tel 040 181 0281).

Koronavirusa dábálaš dávdamearkkat leat earret eará feber, gosahat, oaivebávččas, illáveadjin, luhčadávda, deahkkebákčasat, čottabávččas, nuorvu, vuoigŋanváttisvuođat ja hádja- ja smáhkkaáiccu hedjoneapmi. Mánáin dávdamearkkat sáhttet leat láivvit ja bistit oanehis áiggi. Koronavirusdávdda mearkkaid ii sáhte earuhit eará virusdávddaid mearkkain earágo koronavirusteasttain.

Lasi dieđuid koronavirusdilis gávnnat earret eará Ohcejoga gieldda, Lappi buohccedikšunbire ja THL neahttasiiddus.


Muita uutisia