Sámegielaid gáiddusoahpahusa giđđalohkanbadji álggii 10.1.2022 – boahtte lohkanjahkái almmuheapmi álgá guovvamánus
12.1.2022
Ohcejoga gieldda ja Sámedikki oktasaš sámegielaid gáiddusoahpahusa pilohttafitnu giđđalohkanbadji álggii vuot vuossárgga 10.1.2022.
Fitnus studerejit dál 109 oahppi golmma sámegillii. Giđđalohkanbaji áigge oahppit oahpásmuvvet ain earret eará sápmelaš jahkegirdui.
– Giđa áigge oahpásmuvvat ovdamearkka dihte dasa, mo sápmelaš beassážiid leat ávvudan dolin ja mo daid ávvudit otná beaivve. Kulturgussiid vehkiin oahppit besset oahpásmuvvat iežaset kultuvrii iešguđet surggiid čehpiid geahččanguovllus, muitala anárašgiela oahpaheaddji Henna Aikio.
Arla Magga, guhte bargá Sámedikkis, lea máhccan projeaktakoordináhtora bargui. Son dikšu oktavuođaid skuvllaide. Anni-Sofia Niittyvuopio bargá projeaktahoavdda bargguid Hanna Helandera njealje mánu virgefriddjavuođa áigge. Projeaktahoavda bargá Ohcejoga gielddas.
Gáiddusoahpahusa oahpaheaddjin jotket nuortalašgiela siidodoaibmasaš diibmooahpaheaddji Sirkka Sanila, anárašgiela oaivedoaibmasaš diibmooahpaheaddji Henna Aikio ja davvisámegiela siidodoaibmasaš diibmooahpaheaddji Marianne Ketola. Oaivedoaibmasaš davvisámegiela oahpaheaddjin álggaha Máren-Elle Länsman. Sirkka Sanila oahpaha Stockholmmas, Marianne Ketola Eanodagas ja Henna Aikio ja Máren-Elle Länsman fas Oulus.
Projektii orru stuorra dárbu, daningo dan oahppiid mearri lea dál guovttegeardásaš vuosttás jagi ektui. Projeaktahoavda sávváge, ahte nu ollugat go vejolaš daid sámeoahppiin, guđet vázzet skuvlla sámiid ruovttuguovllu olggobealde, beasašedje searvat oahpahussii.
– Mii ávžžuhit fuolaheaddjiid, oahpaheaddjiid ja oahpahusa lágideaddjiid oahpásmuvvat fitnu oahpahussii ovdamearkan min neahttasiidduin. Bargiide sáhttá maid álo váldit oktavuođa, mii muitalit hui mielas lasi fitnu birra, lohká projeaktahoavda Anni-Sofia Niittyvuopio.
Almmuheapmi lohkanjahkái 2022–2023 rahpasa guovvamánus ja joatkašuvvá njukčamánu lohppii. Almmuheami birra dieđihuvvo sierra ja fidnu ordne infodilálašvuođaid sámegielaid gáiddusoahpahusas beroštuvvan oahppiid fuolaheaddjiide ja oahpahusa lágideaddjiide.
Ođđasat sámegielaid gáiddusoahpahusa pilohttafidnus:
- Sámegielaid gáiddusoahppiid mearri stuorru – Anni-Sofia Niittyvuopio bargagođii fidnokoordináhtorin
- Ođđa Gávpotfearán-mobiilaspeallu oahpaha gávpot- ja dovdosániid golmma sámegillii
- Sámegielaid gáiddusoahpahusfidnu oaččui joatkkaruhtadeami – Fitnus illudit ja vurdet joatkkaáiggi buktit bissovaš čovdosiid
- Sámegielaid oahpaheaddjestudeanttat hárjehalle vuosttaš háve gáiddusin Ohcejoga gieldda jođihan gáiddusoahpahusprošeavttas – “Mun jáhkán, ahte dán vásáhusas lea ávki boahtteáigge”
- Oahpahusráđđehusa Cygnaeus-bálkkašupmi Ohcejoga gieldda ja Sámedikki oktasaš sámegielaid gáiddusoahpahusprošektii
Lassedieđut:
Anni-Sofia Niittyvuopio, projeaktahoavda
Ohcejoga gielda
anni-sofia.niittyvuopio@edu.utsjoki.fi
040 7012 094
Arla Magga, projeaktakoordináhtor
Sámediggi
arla.magga@samediggi.fi
040 6875 989